विदेशमा अलपत्र परेका भुवनको तीन महिनापछि उद्धार

म्याग्दी- रोजगारीका क्रममा विदेश पुगेपछि अलपत्र बनेका रघुगङ्गा गाउँपालिका–६ फुलडाँडाका भुवन विकको करिब तीन महिनापछि उद्धार भएको छ ।

भुवनसँगै सर्बियाबाट इटली जाने क्रममा खोलामा डुङ्गा दुर्घटना हुँदा बेपत्ता भएका बेनी नगरपालिका–९ काउलेगौँडाका बिष्णे सार्कीको अवस्था भने अझै अज्ञात रहेको छ । जिल्ला प्रशासन कार्यालयअन्तर्गतको आप्रवासी स्रोत केन्द्रको समन्वयमा वैदेशिक रोजगार बोर्ड, परराष्ट्र मन्त्रालय र जर्मनीस्थित नेपाली दूतावासको सहकार्यमा गत कात्तिक २५ गते डुङ्गा दुर्घटनामा घाइते र अलपत्र बनेका विकको उद्धार गरिएको हो । गत हप्ता जन्मथलो आइपुगेका विकले नयाँ जीवन पाएको प्रतिक्रिया दिएका छन् ।

“सर्बियामा काम र ज्याला नपाएपछि इटली जान हिँडेका मलगायत १३ जना नेपाली सवार डुङ्गा दुर्घटनामा प¥यो । पानीमा डुबेर घाइते अवस्थामा त्यहाँको प्रहरीले उद्धार गरी उपचार गरे पनि राहदानीलगायत कागजात नहुँदा अलपत्र परेँ,” भुवन विकले भने, “मलाई त्यहाँ पु¥याउने सन्तोष विक, किसान विक र कमल अधिकारीले बेवास्ता गरेपछि घरमा खबर गरेँ । आप्रवासी स्रोत केन्द्रमार्फत उद्धार भएर घर फर्किन पाउँदा नयाँ जीवन पाएको महसुस भएको छ ।”

चिसो पानीमा डुबेको र पानी निलेका कारण स्वास्थ्यमा गम्भीर समस्या देखिएको थियो । हाल स्वास्थ्यमा केही सुधार आए पनि आन्द्रासम्बन्धी समस्या अझै निको नभएको जनाइएको छ । सर्बियामा काम र तलब नपाएपछि अवैध बाटो हुँदै इटली जाने क्रममा उनीहरू दुर्घटनामा परेका थिए ।

आप्रवासी स्रोत केन्द्र म्याग्दीका कर्मचारी प्रमिला पौडेलका अनुसार भुवनकी श्रीमती मीना विकले गत पुस २३ गते पेस गरेको निवेदनका आधारमा गृह तथा परराष्ट्र मन्त्रालय, वैदेशिक रोजगार बोर्ड र जर्मनीस्थित नेपाली दूतावाससँग समन्वय गरी उद्धार प्रक्रिया अघि बढाइएको थियो ।

प्रतिव्यक्ति ११ लाख रुपैयाँ तिरेर भुवनसँगै सर्बिया पुगेका म्याग्दीका अन्य तीन जना भने अपेक्षित काम र तलब नपाएपछि घर फर्किएका छन् । भुवनसँगै डुङ्गा दुर्घटनामा परेका बेनी–९ काउलेगौँडाका बिष्णे सार्कीको अवस्था अझै अज्ञात रहेकाले खोजी गरिदिन उनका आफन्तले आप्रवासी स्रोत केन्द्रमा निवेदन दिएका छन् ।

बिष्णेका भाइ दिलगोपाल सार्कीले दुर्घटनाको दिनदेखि सम्पर्कविहीन रहेका दाइको अवस्था पहिचान र उद्धारका लागि भएको प्रयासबाट हालसम्म कुनै उपलब्धि नहुँदा निराश बनेको बताए ।
“सर्बियाको प्रहरी नियन्त्रणमा रहेका वा अस्पतालमा उपचार भइरहेको हुनसक्ने अनुमान गरेका छौँ,” उनले भने, “अवस्था पत्ता नलाग्दा अलमलमा परेका छौँ ।”