आईसीसी यू–१९ विश्वकप एसिया छनोट आजदेखि काठमाडौंमा
कागजपत्र |
काठमाडौं – आईसीसी पुरूष अन्डर–१९ विश्वकप एसिया छनोट आजदेखि काठमाडौंमा सुरू हुँदैछ।
प्रतियोगिताको पहिलो दिन आज दुई खेल हुँदै छन्। मूलपानीको तल्लो मैदानमा नेपालले युएइसँग खेल्दैछ भने माथिल्लो मैदानमा अफगानिस्तान र ओमान खेल्न लागेका हुन्।
दुबै खेल बिहान साढे ९ बजे सुरु हुनेछन्। हिजो आयोजित क्याप्टेन्स मिटमा सहभागी पाँच वटै देशका कप्तानले आफ्नो टिम विश्वकपमा पुग्ने दाबी गरेका छन्।
प्रतियोगितामा आयोजक नेपालसहित अफगानिस्तान, यूएई, ओमान र हङकङ सहभागी हुने छन्। नेपाली युवा टोलीका कप्तान नरेन भट्टले २ महिनादेखि तयारी थालेको र घरेलु समर्थक माझ नेपाल प्रतियोगिताको शीर्ष स्थानमा रहँदै विश्वकपमा पुग्ने दाबी गरे।
अफगानिस्तान, यूएई, ओमान र हङकङका कप्तानले समेत आफ्नो टोली विश्वकपमा पुग्ने लक्ष्यसहित नेपाल आएको बताए।
प्रतियोगिताको तयारी स्वरुप नेपालले अफगानिस्तानसँग ३ खेलको अभ्यास सिरिज खेलेको थियो।
सो सिरिजमा २–१ ले पछि परेको नेपालले दिल्ली अन्डर–१९ विरुद्धको सिरिज भने ३–० ले क्लिनस्विप गरेको थियो।
प्रतियोगिता अन्तर्गत नेपालले सोमबार ओमानसँग खेल्ने छ भने बुधबार हङकङ र आगामी शनिबार अफगानिस्तानको सामना गर्ने छ।
सिङ्गल राउण्ड रोविनको शीर्ष स्थानमा रहने टोलीले जिम्बाबे र नामिबियामा आयोजना हुने आईसीसी पुरूष अन्डर(१९ विश्वकप २०२६ मा स्थान बनाउने छ । निर्माण कार्य जारी रहेको मुलपानीको तल्लो मैदानमा पहिलो पटक अन्तर्राष्ट्रिय खेल हुन लागेको हो ।
