मन्दिरका मूर्तिहरुमा पिसाब छर्किँदै हिँड्ने महिला ५ बोतल पिसाबसहित पक्राउ
कागजपत्र |
काठमाडौं – क्रिश्चियन धर्म अवलम्बन गर्ने एक महिला मन्दिरको मूर्तिमा पिसाब छर्केको आरोपमा पक्राउ परेकी छिन् ।
काठमाडौँको नागार्जुन नगरपालिका—५ मा रहेको आदेश्वर मन्दिरमा पिसाब छर्केको आरोपमा काठमाडौं महानगरपालिका–१७ धोवीचौर घर भई हाल सुकेधारा बस्ने ६१ वर्षीया मिठु तिवारीलाई प्रहरीले पक्राउ गरेको हो ।
प्रहरी वृत्त स्वयम्भूका अनुसार गत पुस २६ गते एक महिलाले बोतलमा पिसाब लिएर आई आदेश्वर मन्दिर भित्रको मूर्ति समेतमा पिसाब फाली फरार भएको निवेदन प्राप्त भएपछि अनुसन्धान गर्दै जाँदा गर्तौला पक्राउ परेकी हुन् । उनले फागुन २१ गते पनि सोही मन्दिरमा आई पिसाब छर्केको खुलेको थियो ।
उनले नागार्जुन नगरपालिका—५ स्थित चुण्डेश्वर मन्दिर, सीतापाइलास्थित गणेश मन्दिर, हरिसिद्धी मन्दिरमा समेत पिसाब छर्केर फोहोर तथा दूषित कार्य गरेको प्रहरीले जानकारी दिएको छ ।
घटनाको सम्बन्धमा सिसिटिभी फुटेजको आधारमा खोजतलास गर्ने क्रममा गर्तौलालाई चैत २१ गते दिउँसो प्लास्टिकको बोतलमा पिसाब जस्तो देखिने तरल पदार्थ रहेको ५ वटा बोतल साथमा लिई आदेश्वर मन्दिर परिसरबाट पक्राउ गरिएको हो । उनीमाथि ‘धर्म सम्बन्धी कसुर’मा मुद्दा दर्ता भई काठमाडौँ जिल्ला अदालतबाट ५ दिन थप गरेर थप अनुसन्धान कार्य भइरहेको छ ।
प्रारम्भिक अनुसन्धानमा गर्तौलाले २०७६ सालमा हिन्दु धर्म परिवर्तन गरी क्रिस्चियन धर्म मान्दै आएको खुलेको प्रहरीको भनाई छ ।
