प्राचीन सभ्यता र संस्कृतिको जगेर्ना गर्न माैलिक पर्वको महत्वपूर्ण भूमिकाः राष्ट्रपति


काठमाडौं – राष्ट्रपति रामचन्द्र पौडेलले रामनवमी पर्वका अवसरमा सुख, शान्ति एवं समृद्धिका लागि शुभकामना व्यक्त गरेका छन्।

उनले शताब्दीयौँदेखि प्रचलनमा रहेका यी मौलिक पर्वले हाम्रो प्राचीन सभ्यताका साथै धर्म र संस्कृतिको जगेर्ना गर्न थप मद्दत पुग्ने विश्वास व्यक्त गरेका छन्।

‘रामनवमीजस्ता साँस्कृतिक तथा ऐतिहासिक पर्वले हाम्रो विविध जातजाति, भाषाभाषी, सांस्कृतिक एवं भौगोलिक क्षेत्रका नेपालीबीच परस्पर विश्वास, सद्भाव, सहिष्णुता र सहयोगको भावनालाई प्रगाढ बनाउँदै राष्ट्रिय एकतालाई थप सुदृढ बनाउन सहयोग पुग्ने अपेक्षा लिएको छु’, राष्ट्रपति पौडेलले सन्देशमा भनेका छन् ।

नेपालीको मौलिक संस्कृति र परम्पराको संरक्षण तथा प्रवर्धन गरी यो पर्वले सम्पूर्ण नेपालीबीच आपसी समझदारी, दिगो शान्ति एवं भाइचाराको भावना अभिवृद्धि गर्न उत्प्रेरित गर्न सकोस् भन्ने कामना पनि उनले गरेका छन्।

रामनवमीका अवसरमा शुभकामना दिँदै उपराष्ट्रपति रामसहायप्रसाद यादवले यो पर्वले श्रीरामले आफ्नो कर्तव्यपालन गर्दै समाजमा शान्ति, सद्भाव र न्यायको स्थापना कसरी गर्नुभयो भन्ने ग्रहणयोग्य सन्देश दिएको बताएका छन्।

यादवले श्रीरामको आदर्शलाई आत्मसात् गर्दै देश र समाजमा एकता, समृद्धि र प्रगतितर्फ अग्रसरताका लागि प्रण गर्ने अवसरका रूपमा यो पर्वलाई लिनुपर्नेमा जोड दिएका छन्।

प्रतिक्रिया