आज पनि काठमाडौंमा वायु प्रदूषण उच्च, स्वास्थ्यका लागि खतरनाक स्तरमा
कागजपत्र |
काठमाडाैं- उपत्यका विश्वकै दोस्रो प्रदूषित शहरको सूचीमा परेको छ । हाल उपत्यकाको औसत वायु गुणस्तर सूचक (एक्यूआई) २५० पुगेको छ, जुन खतरनाक मानिन्छ । बुधबार नेपालको एक्यूआई २७५ रहेको थियो।
सबैभन्दा प्रदूषित शहरको सूचीमा भारतको दिल्ली पहिलो स्थानमा छ, जहाँ एक्यूआई ३०९ मापन गरिएको छ ।
मौसमविद्हरूका अनुसार शुक्रबारदेखि हावाको वेग बढेकाले काठमाडौंको वायु प्रदूषणमा केही सुधार देखिएको छ । हाल उपत्यकामा वर्षा हुने सम्भावना छैन, तर आकाश क्रमशः खुल्ने लक्षण देखिएको छ ।
वातावरण विभागका तथ्यांकअनुसार भक्तपुरको वायु प्रदूषण अझ खतरनाक अवस्थामा पुगेको छ । आज बिहान ९:३० बजे भक्तपुरको एक्यूआई ४२४ मापन गरिएको छ भने काठमाडौंको एक्यूआई ३४४ रहेको छ। यस्तै, धनगढीमा वायु गुणस्तर सूचक ५०९ पुगेको छ, जुन अति घातक स्तरको हो ।
मकवानपुरको हेटौंडा, बाराको सिमरा, पोखरा, दाङ, नेपालगन्ज, सुर्खेत, महेन्द्रनगर, धनगढी, धनकुटा, झापाको दमक, विराटनगर लगायतका क्षेत्रमा पनि वायु प्रदूषण स्वास्थ्यका लागि हानिकारक अवस्थामा पुगेको छ ।
मौसमविद्हरूले पानी नपरेसम्म प्रदूषणको मात्रा नघट्ने बताएका छन् ।
