

सहकारी तथा लघुवित्तपीडित फेरि सडकमा

काठमाडौं- सहकारी तथा लघुवित्त पीडितहरूले पुनः सडक आन्दोलनमा उत्रिएका छन्। सरकारसँग भएका सहमति कार्यान्वयन नभएको भन्दै सहकारी बचतकर्ता संरक्षण राष्ट्रिय अभियान महासंघको अगुवाइमा उनीहरूले काठमाडौंमा प्रदर्शन गरेका हुन्।
बिहीबार विभिन्न जिल्लाबाट आएका पीडितहरूले बिहीबार रत्नपार्कमा भेला भएर बालुवाटारमा धर्ना दिएका छन् ।
महासंघका अध्यक्ष कुशलभ केसीका अनुसार सरकारले सहकारी पीडित, लघुवित्त पीडित तथा मिटरब्याज पीडितसँग विगतमा गरेको सहमति कार्यान्वयन नगरेपछि उनीहरू आन्दोलनमा उत्रन बाध्य भएका हुन् ।
उनले सरकारले पटकपटक सम्झौता गरे पनि समस्या समाधान गर्न नसकेको गुनासो गरे । विभिन्न समितिहरू बनाएर प्रतिवेदन बुझाइए पनि कार्यान्वयनमा ढिलाइ भएको महासंघको आरोप छ ।
प्रदर्शनकारीहरूले लघुवित्त संस्था खारेज गर्नुपर्ने, सामूहिक ऋण मिनाहा गर्नुपर्ने, मिटरब्याजी तमसुक रद्द गर्नुपर्नेजस्ता माग राख्दै विरोध प्रदर्शन गरेका छन् ।

