प्रसाईंलाई रिहा गर्नुपर्ने मागसहित मुखमा कालो टेप लगाएर प्रदर्शन
कागजपत्र |
काठमाडौं – मेडिकल व्यवसायी दुर्गा प्रसाईंलाई रिहा गर्नुपर्ने माग गर्दै आज पनि प्रदर्शन भएको छ।
प्रसाईंको पक्राउविरुद्ध माइतीघर मण्डलामा मुखमा कालो टेप लगाएर प्रदर्शनकारीले विरोध प्रदर्शन गरेका हुन्।
लघुबित्त तथा बितिय शोषणविरुद्धको संघर्ष समिति नेपाल, चुरेभावर राष्ट्रिय एकता पार्टी नेपाल र नागरिक बचाउ महाअभियान नेपालले प्रसाईंको पक्राउविरुद्ध माइतीघर मण्डलामा विरोध प्रदर्शन गरे ।
प्रसाईं आइतबार भक्तपुरबाट पक्राउ परेका थिए । गत असोज २ मा जिल्ला अदालत काठमाडौंले उनलाई पक्राउ गर्न अनुमति दिएको थियो ।
यता, सर्वोच्च अदालतले बन्दी प्रत्यक्षीकरणको रिटमा कारण देखाउ आदेश जारी गर्दै थुनामुक्त गर्न अस्वीकार गरेको छ ।
न्यायाधीश प्रकाशमान सिंह राउतको इजलासले प्रसाईंका छोरा निराजन प्रसाईंले दायर गरेको बन्दी प्रत्यक्षीकरणको रिटमा सुनुवाइ गर्दै कारण देखाउ आदेश जारी गरेको हो ।
प्रसाईंले आफूलाई गैरकानुनी रुपमा थुनामा राखिएको दाबी गर्दै तत्काल रिहाइको माग गर्दै अन्तरिम आदेश माग गरेका थिए ।
