अमेरिकी एयरफोर्सका विमान बारम्बार किन आइरहेका छन् ? : सांसद घर्तीमगर

काठमाडाैं- नेकपा माओवादी केन्द्रका सांसद पूर्णबहादुर घर्तीमगरले नेपालमा अमेरिकी एयरफोर्सका जहाजहरू बारम्बार आइरहेको भन्दै सरकारसँग जवाफ मागेका छन् ।

सोमबार प्रतिनिधिसभा बैठकको शून्य समयमा बोल्दै उनले गत वैशाख ६, ७, ८ र ९ गते अमेरिकी एयरफोर्सका पाँचवटा जहाज कतारबाट आएकाे बताए ।  ‘ पाँचवटा जहाज कतारबाट प्रत्येक साँझ आउने र बिहान फर्कने गरे । यही असार २ गते पनि मलेसियाबाट सोही एयरफोर्सको जहाज साँझ आएर बिहान फर्कियो । यी जहाजहरूमा के सामान आयो र कसका लागि ल्याइयो ?’ उनले भने ।

अमेरिकी एयरफोर्सको विमान आएको र गएको विषय सरकारी वा निजी सञ्चारमाध्यम कसैले पनि प्रकाशन–प्रसारण नगरेको भन्दै सांसद मगरले यस विषयमा सरकारको ध्यानाकर्षण गराएका छन् ।