काभ्रेमा ब्युटी पार्लर जान्छु भनेर निस्केकी बेहुली फरार
कागजपत्र |
काभ्रेपलान्चोक– काभ्रेपलान्चोकमा बिहेकै दिन एक बेहुली फरार भएकी छिन् । अस्ति शुक्रबार धुलिखेल नगरपालिकाबाट बिहेकै दिन २६ वर्षीया बेहुली फरार भएकी हुन् ।
सोही नगरपालिकाका एक मगर थरका युवकसँग बिहे हुने तयारी भएका बेला उनी ब्युटी पार्लर जान्छु भन्दै घरबाट निस्केकी थिइन् । तर, श्रृङ्गार गर्न गएकी उनी फर्केर आइनन् ।
उनी फरार भएको खबरपछि जन्ती लिएर जाने तयारीमा रहेका बेहुला रोकिएका थिए । भोजखान तयार भएका जन्ती पनि उतै रोकिए । यता बनेपाको चण्डेश्वरी मन्दिरमा पुगेका बेहुलीपट्टीका आफन्त बेहुली नै भागेपछि ट्वाल्ल परेका थिए ।
बेहुलीले मोबाइल समेत स्विचअफ गरेपछि प्रहरीले उनकी आमा र दिदीलाई केरकार गरेको थियो । उक्त विषयमा अनुसन्धान भइरहेको जिल्ला प्रहरी कार्यालय काभ्रेले जनाएको छ ।
