निजी विद्यालयलाई बालेनको उर्दी, ‘शिक्षकलाई तलब सरकारी स्केल अनुसार उपलब्ध गराउनु’

काठमाडौं – काठमाडौं महानगरपालिकाका मेयर बालेन्द्र (बालेन) शाहले महानगरभित्रका निजी विद्यालयहरुलाई सामूदायिक विद्यालयका शिक्षकलाई सरह पारिश्रमिक उपलब्ध गराउन निर्देशन दिएका छन् ।

सामाजिक सञ्जालमार्फत् मेयर बालेनले निजी विद्यालयहरुका शिक्षकहरुको गुनासोपछि स्केल अनुसारको पारिश्रमिक उपलब्ध गराउन निर्देशन दिँदै सो अनुसार नभएमा उजुरी गर्नका लागि अनुरोध समेत गरेका छन् ।

उनले लेखेका छन्, काठमाडौं महानगरपालिकामा संस्थागत ( निजि / Private ) विद्यालयको शिक्षकहरूको तलब सामुदायिक विद्यालयको भन्दा न्यून भएको गुनासो आउने गरेको छ। तर ‘शिक्षा ऐन, २०२८’ को दफा १२(७)(छ) मा संस्थागत विद्यालयको शिक्षकलाई पनि नेपाल सरकारले तोकिदिएको तलब स्केल नघटाई तलब दिनुपर्ने भनी उल्लेख गरिएको छ। यस्तै काठमाडौँ महानगरपालिका विद्यालय शिक्षा व्यवस्थापन नियमावली, २०७४ को नियम ६८ मा शिक्षक तथा कर्मचारीको तलब भत्ता, निवृत्तिभरण, उपदान लगायतका अन्य सुविधा खाइपाइ आएकोमा नघट्ने गरी संघीय शिक्षा कानूनमा तोकिए बमोजिम हुने उल्लेख गरिएको छ।
सोही बमोजिम काठमाडौं महानगरपालिकाका सामुदायिक विद्यालयका शिक्षकहरूले प्राप्त गर्ने निम्न अनुसारको तलब सुविधा संस्थागत विद्यालयको शिक्षकलाई पनि प्राप्त गराउन काठमाडौं महानगरपालिकाका सम्पूर्ण संस्थागत विद्यालयहरूलाई सूचित गरिन्छ।
निम्न अनुसारको तलब सुविधा प्राप्त नभएमा काठमाडौँ महानगरपालिका शिक्षा विभागमा सम्पर्क गर्न अनुरोध गर्दछौँ।