रास्वपामा ढाकाकुमारको बयान – अडियोको आवाज मेरो होइन
कागजपत्र |
काठमाडौं – राष्ट्रिय स्वतन्त्र पार्टीले सांसद ढाकाकुमार श्रेष्ठसँग एक घण्टा बयान लिएको छ । रास्वपा अनुशासन समितिले आज (मंगलबार) दिउँसो पार्टी कार्यालय बसुन्धारामा सांसद श्रेष्ठसँग दुई करोड प्रकरणबारे एक घण्टा बयान लिएको हो ।
श्रेष्ठले ‘स्वास्थ्यमन्त्री बन्नका लागि सभापति रवि लामिछानेको कोर टिमलाई बुझाउन’ भनी दुर्गा प्रसाईसँग दुई करोड मागेको अडियो आइतबार बाहिरिएको थियो । रास्वपाले सोही दिन सांसद श्रेष्ठलाई एक सातासम्मका लागि निलम्बन गरेर छानबिन प्रक्रिया अगाडि बढाएको छ ।
रास्वपा अनुशासन समितिका संयोजक भरतमणि देवकोटाले भने, ‘ढाकाकुमार श्रेष्ठको आज बयान दिने काम भएको छ । पार्टी कार्यालयमा हामीले एक घण्टा बयान लियौं ।’ बयानका क्रममा पनि सांसद श्रेष्ठले प्रष्टिकरणमै उल्लेख गरेको कुरा दोहो¥याएको देवकोटाले जानकारी दिए।
सोमबार साँझ पार्टीको ताकेतापछि श्रेष्ठले आफ्नो स्पष्टिकरण बुझाएका थिए । स्पष्टिकरणका अडियोमा सुनिएको आवाज आफ्नो नभएको र इडिट गरिएको श्रेष्ठको दाबी छ । तर उनले यस विषयमा पार्टीले गर्ने जुनसुकै निर्णय आफूलाई स्वीकार्य हुने बताएका छन् ।
देवकोटाले भने, ‘बयानमा पनि प्रष्टिकरणकै कुरा दोहोर्याउनु भएको छ । हामीले भोलि बिहान रिपोर्ट तयार पार्छौ ।’ यस घटनामाथि छानबिन सकेर अनुशासन समितिले पार्टीको केन्द्रीय समितिलाई सुझाउने उनले बताएका छन् । समितिको सुझावलाई स्वीकार वा अस्वीकार गर्ने अधिकार केन्द्रीय समितिलाई नै रहेका देवकोटाको भनाइ छ ।
