इटहरी उपमहानगरपालिका २० को वडा कार्यालय र प्रहरीको गाडी तोडफोड

काठमाडौं – प्रदेशको नाम कोशी मा असहमति राख्दै आन्दोलनरत पहिचानवादी समूहले सुनसरीको इटहरी उपमहानगरपालिका– २० नम्बर वडा कार्यालयमा तोडफोड गरेको छ । बाक्लो संख्यामा भेला भएका पहिचान पक्षधरहरूले आज बिहान वडा कार्यालयको झ्यालका सिसा र डिजिटल बोर्ड तोडफोड गरेका हुन् ।

विराटनगरमा प्रदर्शनपछि केही दिनअघिदेखि प्रदेशभित्रका विभिन्न नगर तथा वडा कार्यालयहरूमा तालाबन्दी गर्दै आएको थियो । इटहरी– २० का कार्यवाहक वडाध्यक्ष तनुज गुरुङका अनुसार प्रदर्शनमा उत्रेकाहरूले आफूहरूसँग छलफल गरेर ताला लगाएपछि एक्कासि तोडफोड गरेका हुन् ।

यस्तै, तरहरा प्रहरी चौकीको ना।१झ ६२० नम्बरको गाडीसमेत तोडफोड गरेका छन् । वडा कार्यालयमा प्रहरीको गाडी पुग्नेबित्तिकै आन्दोलनकारीहरूले प्रहरीको गाडी तोडफोड गरेका हुन् । ढुंगामुढा प्रहारबाट दुई प्रहरी सामान्य घाइते भएका गुरुङले बताए ।

बिहीबार एक समूहले धरान उपमहानगरपालिकाको कार्यालयमा तालाबन्दी गरेको थियो । प्रदर्शनकारीले करिब साढे ११ बजेतिर ताला लगाएर कार्यालयको छापसमेत जलाएका थिए । पछि प्रहरी आएर ताला खुलाए पनि सोही कारणले शुक्रबारसमेत सेवा प्रवाह प्रभावित भएको सूचना अधिकारी ध्रुव अधिकारीले बताए ।