राष्ट्रपतिमा पौडेलले अत्याधिक मतले जित्नुहुन्छः उपसभापति खड्का

काठमाडौं – कांग्रेस उपसभापति पूर्णबहादुर खड्काले राष्ट्रपतिमा रामचन्द्र पौडेलले अत्याधिक मतले जित्ने दाबी गरेका छन् । उपसभापति खड्काले ९ दलीय गठबन्धनको बैठकपछि सञ्चारकर्मीसँग कुरा गर्दै पौडेलले अत्याधिक मतले जित्ने दाबी गरेका हुन् ।

उनले भने, ‘ ९ दलको तर्फबाट एउटा संयन्त्र बनाएका छौँ । त्यही समितिको बैठक बस्यौँ । राष्ट्रपतिको मतदान गराउँदै छौँ । गठबन्धन त अघि बढिसक्यो । सबैले सहयोग गरेर अत्याधिक मतले जित्नुहुन्छ । ’

उनले आजको बैठकमा बिहीबार हुने राष्ट्रपति निर्वाचनको सन्दर्भमा छलफल भएको बताए । उनले राष्ट्रपति निर्वाचनको व्यवस्थापन सम्बन्धीका बारेमा छलफल भएको बताए । उनले गठबन्धनकै बलमा आगामी दिनमा ९ दलीय गठबन्धनलाई व्यापक र बिस्तार गर्दै जाने बताए ।

उनले भने, ‘आजको बैठक हामीले २५ गते हुने राष्ट्रपति निर्वाचनको सन्दर्भमा ९ दलको तर्फबाट साझा उम्मेदवारको रुपमा प्रस्तुत गरिएका नेपाली कांग्रेसका वरिष्ठ नेता रामचन्द्र पौडेलजीलाई अघि सारेका छौँ। प्राविधिक तयारीको कुरा हो । यो निर्वाचन परिचालनसँग जोडिएको संयन्त्र बनाएका छौँ। त्यसकै जगमा यसलाई बिस्तार र व्यापक गर्दै अघि जान्छौँ । अत्याधिक मतले हामी जित्छौँ ।’

बैठकमा सरकार बिस्तारको बारेमा भने राष्ट्रपति निर्वाचनपछि मात्रै अगाडि बढ्ने निर्णय भएको जनाइएको छ ।