सर्वोच्चको आदेशप्रति माओवादी केन्द्रको ध्यानकर्षण

काठमाडौं – नेकपा माओवादी केन्द्रले पार्टी अध्यक्ष पुष्पकमल दाहाल प्रचण्डविरुद्धको रिट दर्ता गर्न मिल्ने सर्वोच्चको फैसलाको विरोध गरेको छ ।

माओवादी केन्द्रले सर्वोच्चका न्यायाधीशद्वय ईश्वर खतिवडा र हरि फुयाँलको संयुक्त इजलाशबाट शुक्रबार भएको आदेशको गम्भीर ध्यानाकर्षण भएको बताउँदै विज्ञप्तिमार्फत विरोध असहमति प्रकट गरेको हो ।

माओवादी केन्द्रका महासचिव देव गुरुङद्वारा हस्ताक्षरित विज्ञप्तिमा १० वर्षे जनयुद्ध, दोस्रो जनआन्दोलन र त्यसको जगमा भएको शान्ति सम्झौता, अन्तरिम संविधा र संविधानसभाका साथै संघीयता, धर्मनिरपेक्षता, समावेशी समानुपातिक र लोकतान्त्रिक गणतन्त्र आधारभूत संरचनासहितको वर्तमान नेपालको संविधानविरुद्ध हुने कुनै पनि गतिविधि माओवादी केन्द्रलाई अस्वीकार हुने समेत जनाएको छ ।