भारत सरकारको सहयोगमा निर्मित मदन भण्डारी स्मृति कलेजको नयाँ भवन हस्तान्तरण

काठमाडौं – भारत सरकारको आर्थिक सहयोगमा निर्माण गरिएको मदन भण्डारी स्मृति कलेजको नयाँ भवन हस्तान्तरण गरिएको छ। नेपालका लागि भारतीय राजदूत नवीन श्रीवास्तवले सोमबार कलेज व्यवस्थापन समितिलाई नयाँ भवन हस्तान्तरण गरेका थिए।

‘नेपाल-भारत विकास सहकार्य’अन्तर्गत उक्त भवनको निर्माण उच्च प्रभाव सामुदायिक विकास परियोजनाको रूपमा २ करोड ८६ लाखको लागतमा भएको हो। त्रिभुवन विश्वविद्यालयबाट सम्बन्धन प्राप्त उक्त कलेजमा १५ सय बढी विद्यार्थीहरू अध्ययनरत छन्।

हस्तान्तरण समारोहमा नेपाल सरकारका पूर्व परराष्ट्र मन्त्री एवं कलेज व्यवस्थापन समितिका अध्यक्ष महेन्द्र बहादुर पाण्डे, मदन भण्डारी फाउण्डेसनका अध्यक्ष उषाकिरण भण्डारी र काठमाडौं जिल्ला समन्वय समितिका अध्यक्ष सन्तोष बुढाथोकीको उपस्थिति थिए।

सन् २००३ यता भारतले नेपालमा ५३५ भन्दा बढी उच्च प्रभाव सामुदायिक विकास परियोजना सञ्चालन गरेकोमा ४७८ वटा परियोजना सम्पन्न भइसकेका छन्। तीमध्ये काठमाडौं जिल्लाका ४० वटा परियोजनासमेत गरी बाग्मती प्रदेशमा १०४ वटा परियोजना रहेका छन्।

यसबाहेक यस कलेजलाई प्रदान गरिएको एक स्कुल बससहित भारत सरकारले हालसम्म काठमाडौंका विभिन्न अस्पताल, स्वास्थ्य चौकी एवं शैक्षिक संस्थालाई ६८ वटा एम्बुलेन्स र ४६ वटा स्कुल बस उपहार स्वरुप प्रदान गरेको छ।