कांग्रेस सांसद चन्द्र भण्डारी ग्यास दुर्घटनामा परी आमासहित घाइते, आईसीयूमा उपचार हुँदै

काठमाडौं — ग्यास सिलिन्डर विस्फोट हुँदा नेपाली कांग्रेसका सांसद डा.चन्द्र भण्डारी घाइते भएका छन् ।

भण्डारीको बुद्धनगरस्थित निवासमा बुधबार राति १० बजेतिर ग्यास सिलिन्डर विस्फोट हुँदा भण्डारी र उनकी आमा घाइते भएको उनका सहयोगी भुवन भुसालले जनाए ।

भुसालका अनुसार अहिले उनीहरूको कीर्तिपुर अस्पतालमा आईसीयूमा उपचार भइरहेको छ ।

‘अहिले आईसीयूमा हुनुहुन्छ । डाक्टरको टिमले उपचार गर्दै छ । सांसदज्यूको शरिरको २५ प्रतिशत भाग जलेको जानकारी पाएका छौँ । आमाको ७० प्रतिशतभन्दा धेरै जलेको छ । बाँकी भोलि बिहान थाहा होला,’ भुसालले भने ।

भुसालसहित आफन्तहरू अस्पतालमै छन् । भुसालका अनुसार ग्यास लिक भएर सिलिन्डर विस्फोट भएको आशंका गरिएको छ ।

बुधबार राति नै कांग्रेस महामन्त्री विश्वप्रकाश शर्मा, एनपी साउँदसहितका नेताहरू अस्पताल पुगेका थिए ।

महामन्त्री शर्माले आफू भर्खरै अस्पतालबाट फर्किएको बताउँदै सांसद भण्डारी र उनकी आमाको शीघ्र स्वास्थ्यलाभको कामना गरेका छन् ।
शर्माले अगाडि लेखेका छन्,

अस्पतालबाट भर्खर फर्किएको छु !