उच्चस्तरीय राजनीतिक संयन्त्रको बैठक अनिश्चित

काठमाडौँ – उच्चस्तरीय राजनीतिक संयन्त्रको बैठक अनिश्चित भएको छ ।

प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष समेत रहेका उच्चस्तरीय संयन्त्रका संयोजक केपी शर्मा ओलीबीच बुधबार ओली निवास बालकोटमा भएको भेटवार्तामा आजका लागि संयन्त्रको बैठक बसेर पछिल्लो राजनीतिक घटनाक्रमबारे छलफल गर्ने सहमति भएको थियो ।

तर, बिहीबार १० बजेसम्म पनि संयन्त्रको बैठक बस्ने नबस्ने कुनै ठेगान नभएको प्रधानमन्त्री प्रचण्डको निजी सचिवालयले जनाएको छ । ‘आज बिहीबार संयन्त्रको बैठक बस्ने भनिएको हो । तर अहिलेसम्म कुनै निश्चित भैसकेको छैन । बस्न पनि सक्छ नबस्न पनि सक्छ, त्यसैले अहिलेसम्म समय पनि तोकिएको छैन’, प्रधानमन्त्रीका प्रेस विज्ञ मनहरि तिमिल्सिनाले अनलाइनन्यूज७सँग  बताए ।

यसअघि आज बस्ने भनिएको बैठकमा राष्ट्रपतिको उम्मेदवार र सुदूरपश्चिम प्रदेश सरकारका बारेमा छलफल हुने जनाइएको थियो । सुदूरपश्चिम सरकारका मुख्यमन्त्रीले आज विश्वासको मत लिनुपर्ने अन्तिम दिन समेत रहेको छ ।