सन्दीपको मुद्दाको सुनुवाई न्यायाधीश फुयाँलको इजलासमा
कागजपत्र |
काठमाडौं – क्रिकेटर सन्दीप लामिछानेविरुद्ध महान्यायाधिवक्ता कार्यालयले सर्वोच्च अदालतमा आज न्यायाधीश हरिप्रसाद फुयाँलको इजलासमा सुनुवाई हुने भएको छ ।
उक्त इजलासको दोस्रो नम्बरमा नै सन्दीपविद्धको मुद्दाको सुनुवाई तोकिएको छ ।
नाबालिग बलात्कारको अभियोग लागेका लामिछानेलाई पुर्पक्षको लागि धरौटीमा छोड्ने उच्च अदालत, पाटनको आदेश बदर गर्न माग गर्दै सन्दीपविरुद्ध महान्यायाधिवक्ता कार्यालयले निवेदन दिएको थियो ।
नेपाल सरकारको तर्फबाट नायब महान्यायाधिवक्ताद्वारा दायर निवेदनमा उच्च अदालत पाटनको गत पुस २८ मा भएको आदेशमा प्रतिवादी लामिछानेलाई थुनामा राखी मुद्दा पुर्पक्ष गर्नुपर्ने उल्लेख छ ।
लामिछानेलाई उच्च अदालत पाटनले सर्तसहित २० लाख नगद धरौटी वा बैंक जमानत लिई तारेखमा राख्न आदेश दिएको थियो । निवेदनमा लामिछानेले प्रमाण नष्ट गर्न सक्ने पनि आशङ्का व्यक्त गरिएको छ ।
नेपाल क्रिकेट संघ (क्यान) ले सन्दीपलाई आगामी महिना हुने त्रिकोणात्मक सिरिजका लागि बन्द सत्र प्रशिक्षणमा टिममा समेटेको छ ।
