ओलीले भने- चुनावै गएर जित्ने ठाउँ छ नि, तर संसद विघटन फिर्ता गराउन पाए मेरो जित हुन्थ्यो भन्ने छ

काठमाडाैं – प्रधानमन्त्री केपी शर्मा ओलीले युद्धमा कहिल्यै नहारेको नेपालले खेलकुदमा पनि हार्न नहुने बताएका छन्। राष्ट्रिय खेलकुद परिषद्ले आयोजना गरेको ‘खेलकुदसँग प्रधानमन्त्री’ अन्तर्क्रिया कार्यक्रममा उनले यस्तो बताएका हुन् ।

‘अंग्रेजको लडाइँ खुकुरीले जित्ने नेपालीले खेलमा किन हार्नु परेको छ र ! फुटबलमा भकुन्डो हान्ने र क्रिकेटमा बलमा हान्ने त हो,’ उनले भने, ‘कहिल्यै उपनिवेश नबनेको, कहिल्यै नहारेको देश यत्रा–यत्रा डल्ला फ्याँक्दा किन हार्ने ?’

उनले खेलमा हुने जित र हारको ठूलो अर्थ हुने बताए । अन्य क्षेत्रमा पनि जित र हारको विषय ‘इगो’ बन्ने गरेको बताए। संसद विघटनको जित र हारको विषयमा भइरहेको उनको भनाइ छ।

‘संसद विघटन पनि जित र हार विषय बनिरहेको छ। संसद भंग भइसक्यो। चुनाव आउन लागिसक्यो। केही मानिसहरू चुनाव हुन्न भनिरहेका छन्। केहीका लागि होइन। जिते भन्ने पार्नका लागि। चुनावै गएर जित्ने ठाउँ छ नि। तर यो फिर्ता गराउन पाए मेरो जित हुन्थ्यो भन्ने छ।’

उनले जित्ने ठाउँ चुनाव भएको बताए। तर, प्रचण्ड–नेपाल पक्षलाई प्रतिनिधि सभा विघटन फिर्ता गर्न पाए जित हुन्थ्यो भन्ने लागेको उनको भनाइ थियो।