श्रीमती र छोरालाई पेट्रोल छर्किएर आगो लगाइदिँदा छोराको मृत्यु, श्रीमती घाइते

बाँके — बाबुले पेट्रोल छर्किएर आगो लगाइदिँदा २ वर्षीय छोराको मृत्यु भएको छ । बाँके जिल्लाको कोहलपुर नगरपालिका –२ वडा नम्बर २ शक्तिनगरका भानुभक्त विकले पेट्रोल छर्किएर आगो लगाउँदा उनका दुई वर्षीय छोरा प्रिन्सको मृत्यु भएको छ भने श्रीमती गंगा घाइते छिन् ।

विकले आइतबार अपराह्न पाँच बजेतिर गंगा र प्रिन्सलाई पेट्रोल छर्किएर जलाएका थिए । त्यसपछि भारततर्फ भागेका उनलाई प्रहरीले गएराति साढे १ बजेतिर नियन्त्रणमा लिएर कारबाही प्रक्रिया अघि बढाएको छ ।

जलेर गम्भीर घाइते भएका दुई वर्षीय बच्चा प्रिन्सको भेरी अस्पताल नेपालगञ्जमा उपचारको क्रममा आज बिहान मृत्यु भएको जिल्ला प्रहरी कार्यालय बाँकेका प्रवक्ता डीएसपी रामप्रसाद घर्तीमगरले जानकारी दिए ।

कोहलपुर नगरपालिकाकी उपमेयर संगीता सुवेदीका अनुसार भानुभक्तले एक वर्ष अगाडिदेखि नै श्रीमती गंगालाई कुटपिट गर्दथे । आइतबार पनि बिहानैदेखि दुई जनाबीच झगडा भएको थियो ।

साँझ पाँच बजेतिर गंगा माइत जान भनेर हिंडेपछि भानुभक्तले पेट्रोल छ्यापेर आगो लगाइदिएका थिए । ‘अब बाँच्नुपर्छ भनेर बाबु बोकेर म हिंडें’ गंगाले भनिन्, ‘परैबाट पेट्रोल छ्यापेर आगो फाल्दियो ।’

बच्चाको कम्मरभन्दा माथिको भाग जलेको थियो । श्रीमती गंगाको पनि घाँटी, हात, कान लगायतका भाग जलेको छ । प्रहरीका अनुसार गंगाको शरीरको करिब २० प्रतिशत भाग जलेको छ ।

अहिले गंगाको उपचार नेपालगञ्जस्थित भेरी अस्पतालमा भईरहेको छ ।