मन्त्रिमण्डल विस्तार आज हुँदै, दिउँसो १ बजे सपथ गर्ने तयारी
कागजपत्र |
काठमाडौं – आज दिउँसो १ बजे नयाँ थपिने मन्त्रीहरुले सपथ ग्रहण गर्ने कार्यक्रम तय भएको छ । सत्ता साझेदार दलहरूको उच्चस्तरीय राजनीतिक संयन्त्रको बैठकले सोमबार साँझ मन्त्रालय भागबन्डाको टुङ्गो लगाएसँगै सपथको समयका लागि राष्ट्रपतिसमक्ष समय मागिएको जनाइएको छ ।
मन्त्रालय भागबन्डामा सहमति भइसकेको गृहमन्त्री रवि लामिछानेले जनाए । उनले भने, “कुन मन्त्रालय कुन पार्टीलाई भन्ने विषय टुङ्गिएको छ, तर भोलि आ–आफ्नो पार्टीमा छलफल भएपछि मात्रै सार्वजनिक हुन्छ ।”
जसअनुसार रविको पार्टीले शिक्षा र श्रम मन्त्रालय पाएको छ । त्यसका साथै एक राज्यमन्त्री र उपसभामुख पनि पाउने भएको छ ।
राष्ट्रपति विद्यादेवी भण्डारीले नेकपा (माओवादी केन्द्र) का अध्यक्ष दाहाललाई गत पुस १० गते प्रधानमन्त्रीमा नियुक्त गरेकी थिइन । विश्वासको मत पाएपछि मन्त्रिपरिषदलाई पूर्णता दिने गृहकार्य सुरु भएको हो ।
सपथग्रहण कार्यक्रमपछि दिउँसो ४ बजे सर्वदलीय बैठक बस्ने पनि जनाइएको छ ।
