दोस्रो अभ्यास खेलमा नेपाल विजयी

काठमाडौं – नेपाली राष्ट्रिय क्रिकेट टोलीले भारतको दिल्ली जिल्ला क्रिकेट एसोसियसन (डिडिसिए)विरुद्धको दोस्रो अभ्यास खेलमा जित निकालेको छ । दिल्लीस्थित अरुन जेट्ली क्रिकेट मैदानमा शनिबार भएको खेलमा नेपालले डिडिसिएलाई ६ विकेटले हरायो ।

डिडिसिएले दिएको एक सय ५९ रनको विजय लक्ष्य पछ्याएको नेपालले २८.२ ओभरमा चार विकेटको क्षतिमा लक्ष्य पूरा गरेको थियो । नेपालको जितमा ज्ञानेन्द्र मल्लले अविजित ४८ रन बनाए ।

आसिफ शेखले ३०, अर्जुन साउदले २८ र कप्तान रोहित कुमार पौडेलले २४ रन बनाए । बलिङमा डिडिसिएका लागि सिद्धान्त शर्मा, रवि रोशन, पर्थ वाडर र ध्रुव चौहानले एक एक विकेट लिए ।

यसअघि पहिलो ब्याटिङ गरेको डिडिसिएको ४०.५ ओभरमा सवै विकेटको क्षतिमा एक सय ५८ रन बनाएको थियो । डिडिसिएका लागि काव्य गुप्ताले अविजित ३४ रन बनाए । सलिल मल्होत्राले ३१, कप्तान बैभव शर्माले २६, कनभ गम्भिरले २१ र पर्थ वाडहाराले १३ रन बनाए ।

बलिङमा नेपालका सागर ढकालले पाँच विकेट लिए । कुशल भुर्तेलले दुई तथा हरिशंकर शाह, ललित नारायन राजवंशी र सोमपाल कामीले एक एक विकेट झारे । यसअघि बिहीबार भएको पहिलो खेलमा नेपाल (डिडिसिए) सँग दुई विकेटले पराजित भएको थियो । नेपालले आईसीसी विश्वकप क्रिकेट लिग–२ अन्तर्गत नामिबिया भ्रमणको तयारीका लागि डिडिसिएसँग अभ्यास खेल खेलेको हो ।

नामिबियामा डिसेम्बर २ देखि ८ तारिखसम्म सञ्चालन हुन आईसीसी विश्वकप लिग–२ को त्रिकोणात्मक एकदिवसीय सिरिज खेल्न नेपाल भारतबाटै आइतबार नमिबिया प्रस्थान गर्नेछ । लिग–२ सिरिजमा नेपाल, नामिबिया र स्कटल्यान्डबीच प्रतिस्पर्धा हुनेछ । लिग–२ मा हाल नेपाल १७ अङ्कसहित छैटौँ स्थानमा छ ।