गोरखामा कांग्रेसका सुरेन्द्र पाण्डेले नै उठाएका हुन् प्रचण्डविरुद्ध बागी उम्मेदवार?

काठमाडौँ। सामाजिक सञ्जालमा अहिले दुई तीन वटा फोटो भाइरल छ। त्यस फोटोमा नेपाली कांग्रेसका केन्द्रीय सदस्य तथा अहिले गोरखा निर्वाचन क्षेत्र नम्बर २ (ख)मा गठबन्धनको उम्मेदवार सुरेन्द्र पाण्डेले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को माला मिलाइदिएको देख्न सकिन्छ। यसलाई लिएर अनेक टिप्पणी भइरहेको छ। जहाँ प्रचण्डले आफ्नो गलामा भएको माला पनि मिलाउन सक्दैनन् जसरी पाण्डेले सुमसुम्याइरहेका छन्।

यसको अनेक कारण छन्। निर्वाचन क्षेत्र २ क का पाण्डे ख मा एक हिसाबले टुरिस्ट उम्मेदवार हुन्। उनी निर्वाचन ताका र कांग्रेसका कुनै सभाबाहेक निर्वाचन क्षेत्र पुग्दैनन्। त्यसैले उनी मतदातामाझ परिचित अनुहार होइनन्। विगतमा माओवादीको सत्तोसराप गर्ने पाण्डे माओवादीकै अध्यक्षको आडमा चुनावमा मत कसरी धेरै ल्याउने भनेर अनेक इन्टनबाजी गर्दैछन्। त्यसकै एक गतिलो उदाहरण हो प्रचण्डको माला मिलाउन तम्सिएको। अर्को कुरा पाण्डे यस्ता नेता हुन् जो माओवादीलाई गालीमात्रै गरिरहन्छन्।

कुरा यति मात्रै होइन ०७४ को निर्वाचनमा छेपेटारमा भएको चुनावी कार्यक्रममा बाबुराम भट्टराईसँगै बसेर पाण्डेले भनेका थिए – माओवादी देशद्रोही हो। हत्यारा हो। जनता मारा हो।’ यो त उदाहरणमात्रै हो पाण्डे हरेकजसो कार्यक्रममा माओवादीलाई गाली गरिरहेकै हुन्छन्।

माओवादीप्रति कडा देखिने पाण्डे अहिले माओवादीकै वैशाखीमा टेकेर चुनावी मैदानमा छन्। उनलाई माओवादीका नेता कार्यकर्ताले कत्तिको मत दिन्छन् त्यो मंसिर ४ पछि नै थाहा होला।

अब मुख्य विषयमा प्रवेश गरौँ। प्रतिनिधिसभामा प्रचण्ड र प्रदेशमा आफू उम्मेदवार बन्दा पनि पाण्डेले प्रचण्डविरुद्ध गतिविधिलाई भने निरन्तरता दिइरहेको सहजै देख्न सकिन्छ। मंसिर ४ मा हुने पाण्डेले आफूनिकट नेतालाई नै प्रचण्डविरुद्ध उम्मेदवार बनाएका छन्। पाण्डेका उम्मेवादर हुन् गणेश देवकोटा। पालुंटारका देवकोटा नेपाली कांग्रेसका नेता हुन्। देवकोटा एक पटक क्षेत्रीय सभापति लडेर हारेका मान्छे हुन् भने गत अधिवेशनमा कांग्रेसको महाधिवेशन प्रतिनिधि हारेका हुन्। उनलाई महाधिवेशन प्रतिनिधिको उम्मेदवार बनाउन पाण्डेकै जोडबल थियो।

देवकोटाले अहिले स्वतन्त्र उम्मेदवार बनेर खरायो चुनाव चिह्न पाएका छन्। प्रचण्डकै सहारामा चुनाव जितौँला भनेर तम्सिने तर यता प्रचण्डकै विरुद्ध उम्मेदवार उठाउने पाण्डेबारे नेता कार्यकर्ताले पनि पार्टी नेतृत्वसँग असन्तुष्टी पोख्न थालिसकेका छन्। चुनावी मत परिणाममा इतिहास कायम गर्न भन्दै गोरखा गएका प्रचण्डमाथि कांग्रेस सभापति शेरबहादुर देउवानिकटका पाण्डे नै तगारो बन्ने पक्का भएको छ।

गोरखाका एक जना माओवादी नेताले त प्रचण्डको मत घटाउनै पाण्डेले देवकोटालाई उम्मेदवार बनाएको आरोप लगाए। उनले भने, ‘यसपटक प्रचण्ड गोरखा आउनु भएको छ। स्थानीय तहको निर्वाचनबाट गोरखामा पुरानै अवस्थामा फर्किने संकेत गरेको बेलामा उहाँ यहाँ आउनु राम्रो भयो तर कांग्रेसकै नेताले तालमेल गर्ने प्रचण्डविरुद्ध नै बागी उठाउने गरेको पाइयो। यसको हिसाब किताब अब हामी पनि मंसिर ४ मै गरौँला।’