मेस्सी, नेयमार र एमबाप्पेको गोलमा पीएसजीको जित

काठमाडौँ- च्याम्पियन्स लिगअन्तर्गत बुधबार राति भएको खेलमा पेरिस सेन्ट जर्मेन (पीएसजी)ले माकाबी हाइफामाथि ३–१ गोल अन्तरको जित हात पारेको छ।

बुधबारको खेलको २४ औं मिनेटमा नै गोल गर्दै हाइफाले अग्रता लिएको थियो। तर, खेलको ३७ औं मिनेटमा पीएसजीका लागि लियोनेल मेस्सीले बराबरी गोल फर्काएका थिए।

पहिलो हाफ बराबरीमा सकिए पनि दोस्रो हाफमा पीएसजीले थप दुई गोल गरेको थियो। खेलको ६९ औं मिनेटमा किलियान एमबाप्पेले गोल गरेका थिए भने ८८ औं मिनेटमा नेयमारले एक गोल थपेका थिए।

यसअघि पहिलो खेलमा पीएसजीले युभेन्टसमाथि जित हात पारेको थियो।