सडकको अत्तोपत्तो छैन, गोरखाको नारेश्वरमा बनिसक्यो मोटरेबल पुल

 काठमाडौँ।   गोरखामा सडक नै नभएको ठाउँमा पुल बनाइएको छ। गोरखा नगरपालिका वडा नम्बर ३ नारेश्वर र छिमेकी गाउँ, सिरानचोक गाउँपालिका वडा नम्बर ५ जरेबर जोड्न गाडी गुड्ने पक्की पुल बनाइएको हो। तर यहाँ जाने सडक कतै पनि छैन। सडकको ट्रयाक नै छैन।  नारेश्वर हुँदै घलाङबाट सडक ट्याक खन्न सुरू गरे पनि पुल निर्माणस्थलसम्म पुगेको छैन।

पुल निर्माणमा सिरानचोक ५ छोप्राकका स्थानीय किसानसँग कुराकानी नगरिएको पाइएको छ। यो पुल जोड्ने सडक बनाउँदा ती स्थानीयका खेत पर्छन्। स्थानीयसँग सल्लाह नगरी  पुल बनाएपछि स्थानीय रुष्ट छन्। अब सडक ल्याएको खण्डमा खेतीयोग्य जमिन मासिने भन्दै स्थानीय आक्रोशित छन्।

छेवैमा रहेको मध्यपहाडी लोकमार्गसँग नारेश्वरलाई जोड्न यो पुल बनाइएको बुझिएको छ।  दरौंदीमा निर्माण गरिएको पुलको नारेश्वरतर्फ भागमा जंगल र पहरा छन् भने सिरानचोकतर्फ भने खेत छ। गण्डकी प्रदेशस्थित भौतिक पूर्वाधार मन्त्रालयले यो पुल बनाएको हो।

नारेश्वर घर भएका नेकपा एमालेका प्रदेश सांसद तथा यसअघिका भौतिक पूर्वाधारमन्त्री रामशरण बस्नेतले यो पुलको योजना पारेर काम अघि बढाएका थिए।

दरौंदी नदीमाथि ५० मिटर लामो पुल बनाइएको छ। पुल निर्माण कार्य करिब ९३ प्रतिशत सकिएको छ। यो पुल निर्माणमा पाँच करोड ३९ लाख ८० हजार खर्च भएको छ। एचटिसी गोसाइँकुन्ड, आइएस निर्माण सेवा जेभीले ठेक्का पारेर यो पुल बनाएको हो।

यो पुल निर्माण गर्न २०७७ जेठमै सम्झौता भएको थियो। सम्झौताअनुसार २०७९ जेठमा पुल निर्माण सक्नुपर्ने भए पनि अझै सात प्रतिशत काम बाँकी छ।

दुई वर्षअघि देखि यस ठाउँमा उक्त पुल बनिरहे पनि स्थानीयले खासै विरोध गरेका थिएनन्। पुल बनेपछि अब सडक ट्याक निर्माण अघि बढ्ने भएपछि खेत पर्ने भन्दै स्थानीयले क्षतिपूर्ति पाउनुपर्ने माग राखेका छन्।