काठमाडौँ महानगर : दाताले दिएको फोहोर प्रशोधन गर्ने मेसिन र गाडी पनि फोहोरकै थुप्रोमा

काठमाडौं- काठमाडौं महानगरपालिकाको यसअघिको नेतृत्वले जे छोयो त्यही फोहोरमा परिणत भएको थियो। चीन सरकारले काठमाडौं महानगरलाई फोहोर उठाउन दुई सयबढी गाडी उपहारमा दिएको थियो।

तर, त्यो फोहोरमै परिणत भइसकेको छ। अधिकांश गाडीहरू चल्ने अवस्थामा नरहेको त्यहीँका कर्मचारी स्वीकार्छन् । यसअघिका वातावरण व्ययवस्थापन प्रमुख हरिकुमार श्रेष्ठले अधिकांश गाडीका पाटपुर्जा निकालेर चल्ने हालतमा रहेका सवारीमा प्रयोग गरेको बताएका थिए।

यस्तै, युरोपियन युनियनले फोहोर प्रशोधन गर्न भनेर सन् २०१६मा दिएको मेसिन पनि फोहोरमै परिणत भइसकेको छ। युनियनले उपलब्ध गराएको फोहोर प्रशोधन गर्ने मेसिन भित्रको भल्भ फुटेर अलपत्र परेको महानगरसम्बद्ध कर्मचारी बताउँछन्।

‘बेलुनजस्तो भल्भ हुँदो रहेछ। त्यो यहाँ नपाइने। त्यही नभएर कुहिने फोहोर प्रशोधन गरेर ऊर्जामा परिणत गर्ने मेसिन काममा आउन सकेको छैन,’ महानगरका एक कर्मचारीले भने ।