आईपीएलः कोलकातासँग हार्यो मुम्बई
कागजपत्र |
काठमाडाैँ– इन्डियन प्रिमियर लिग (आईपीएल)अन्तर्गत सोमबार भएको खेलमा कोलकाताले मुम्बई इन्डियन्समाथि ५२ रनको फराकिलो जित हात पारेको छ।
सोमबारको खेलमा पहिला ब्याटिङ गरेको कोलकाताले निर्धारित २० ओभरमा ९ विकेट गुमाएर १६५ रन बनाएको थियो। कोलकाताका लागि वेन्कटेश अय्यर र नितिश रानाले समान ४३ रनको पाली खेलेका थिए। मुम्बईका जसप्रित बुमराहले ५ विकेट लिए।
जवाफी ब्याटिङमा उत्रिएको मुम्बई १७ ओभर ३ बलमा ११३ रनमा समेटियो। मुम्बईका इशान किसनले ५१ रन बनाए पनि त्यो जितका लागि पर्याप्त हुन सकेन। कोलकाताका प्याट कमिन्सले ३ विकेट लिए भने आन्द्रे रसेले २ विकेट हात पारे ।
मुम्बईको लागि जारी आईपीएलमा यो नवौं हार हो। लिगको पुछारमा रहेको मुम्बईले ११ खेलबाट ४ अंक हात पारेको छ। कोलकाताले भने १२ खेलबाट १० अंक जोडेको छ।
