भारतको हरियाणा आगलागी : १४ वर्षीय नेपाली बालक भीमबहादुरको जलेर मृत्यु

काठमाडौँ- भारतको हरियाणा हिसारमा भएको आगलागीमा अर्घाखाँचीका एक १४ वर्षीय बालकको ज्यान गएको छ । हरियाणामा रहेको राम चाट भण्डारमा काम गर्ने अर्घाखाँची जिल्लाको छत्रदेव गाउँपालिका वडा नं ३ साजवोट निवासी १४ वर्षीय भीमबहादुर मुखियाको ज्यान गएको हो।

मुखियासहित १० जना नेपाली मजदुरहरुले काम गर्दै आएको चाट भण्डारमा मंगलबार बिहान करिब ५ बजे विद्युत सर्ट भई आगो लाग्दा सोही पसलमा दुई महिनादेखि काम गर्दै आएका मुखियाको ज्यान गएको छ भने अन्य पाँच नेपाली सामान्य घाइते भएका छन्।

आगलागीका कारण अन्य कामदार बाहिर निस्कन सफल भएको भए पनि बालक बाहिर निस्कन नसकेपछि जलेर ज्यान गएको स्थानीय नारायण न्यौपानेले जानकारी दिए। मृतक मुखियाका बुवा हिमबहादुर मुखिया पनि भारतमा मजदूरी गर्छन्।