अर्थतन्त्र सुधारमा लाग्यो सरकार, बृहत अन्तरक्रिया गर्ने गठबन्धनको निर्णय !
कागजपत्र |
काठमाडौं – पछिल्लो समय अर्थतन्त्रमा देखिएको नकारात्मक प्रभाव सुधारका लागि सत्ता गठबन्धनले अन्तरक्रिया गर्ने भएको छ । प्रधानमन्त्री कार्यालयमा मंगलबार बसेको पाँच दलीय गठबन्धनको बैठकले देशको अर्थतन्त्र सुधारका लागि बृहत् अन्तरक्रिया गर्ने निर्णय गरेको हो ।
गठबन्धनको बैठकले देशको अर्थतन्त्रको अवस्थालाई ध्यान दिँदै सरकारको तर्फबाट राजनीतिक दल, अर्थविद्, योजनाविद् र सरोकारवाला पक्षसँग बृहत् अन्तर्क्रियाको आयोजना गर्ने र सुझावको आधारमा ठोस कदम चाल्ने निर्णय भएको जनाइएको छ ।
बैठकमा नेपाली कांग्रेसमा सभापति एवं प्रधानमन्त्री शेरबहादुर देउवा, माओवादी केन्द्रका अध्यक्ष प्रचण्ड, एकीकृत समाजवादी, जनता समाजवादी पार्टी र राष्ट्रिय जनमोर्चाका नेताहरू सहभागी भएका थिए ।
गठबन्धनको बैठकमा प्रधानमन्त्री देउवाको भारत भ्रमणको ब्रिफिङ भएको थियो । बैठकले प्रधानमन्त्रीको भारत भ्रमण सफल रहेको निष्कर्ष निकालेको छ ।
त्यसैगरी, बैठकले कांग्रेस नेता रामचन्द्र पौडेलको संयोजकत्वमा निर्वाचन तयारी तथा अनुगमन समिति गठनको निर्णय पनि गरेको जनाइएको छ ।
