गाडी लगायत विलासी वस्तुको एलसी रोक्न राष्ट्र बैंकको निर्देशन

काठमाडौं –  नेपाल राष्ट्र बैंकले अत्यावश्यक बाहेकका सम्पूर्ण आयातित वस्तुको एलसी बन्द गर्न बैकहरुलाई निर्देशन गरेको छ । सोमबार २७ वटै वाणिज्य बैंकका प्रमुख कार्यकारी अधिकृत (सीईओ)हरुलाई बोलाएर बैंकले यस्तो निर्देशन दिएको हो । पछिल्लो समय तीब्र आयातका कारण सोधानान्तर स्थिति लगातार घाटामा गएको, व्यापारघाटा उच्च भएको र वैदेशिक मुद्राको सञ्चितिमा उच्च दवाव परेको भन्दै राष्ट्र बैंकले बैंकहरुलाई यस्तो निर्देशन दिएको हो ।

हालै मात्र बैंक सुपरीवेक्षण विभागकाे नेतृत्वमा सरुवा भएका कार्यकारी निर्देशक देवकुमार ढकालकाे सक्रियतामा छलफल भएकाे हाे । उनले असार मसान्त नजिकिँदै गर्दा पनि राष्ट्र बैकमा पेस गरेकाे याेजनाअनुसार सीडी रेसियाे नघटेपछि चासाे लिँदै ढकालले बैंकका सीईओसँग छलफल गरेका हुन् । छलफलमा सहभागी वाणिज्य बैंकका प्रमुख कार्यकारी अधिकृतका अनुसार केन्द्रीय बैंकले अनौपचारिक छलफल गर्दै हाल अर्थतन्त्र ठूलो संकटमा भएकोले संकटको निवारण गर्न बैंकहरूको ठूलो भूमिका रहने बताएका थिए ।

‘हामी इनारको डिलमा छौं, यसमै हामफाल्ने कि यसबाट बच्ने भन्नेमा ध्यान दिनुपर्छ’ भन्दै राष्ट्र बैंकका अधिकारीले वाणिज्य बैंकका प्रमुख कार्यकारी अधिकृतहरुलाई गाडी कर्जा रोक्न निर्देशन दिएको बताए । “बैठकमा राष्ट्र बैंकले अत्यावश्यक बाहेकका वस्तुमा जाने कर्जा रोक्नु भनेको छ,” उनले भने ।

विदेशी मुद्राको सञ्चितिमा दबाब बढ्दै गएको बताउँदै केन्द्रीय बैंकले आयातीत वस्तुमा जाने गाडी आयातको प्रतितपत्र (एलसी) रोक्न निर्देशन दिएको बैंकका प्रमुख कार्यकारीहरूको बुझाइ छ । केन्द्रीय बैंकले यसअघि नै सुन, चाँदीलगायत विभिन्न वस्तुको आयातमा शतप्रतिशत नगद मार्जिनको व्यवस्था गरेको थियो ।

राष्ट्र बैंकले केही समय अगाडिदेखि नै गाडी आयात राेक्नुपर्ने बताइरहेकाे थियाे । तर सरकारले राजस्व प्रभावित हुने भएपछि यसमा कुनै निर्णय गरेकाे छैन । राष्ट्रिय बैंकले नै विद्युतीय बाहेकका गाडि आायातका लागि एलसी खाेल्दा ५० प्रतिशत नगद मार्जिनकाे व्यवस्था गरेकाे छ । तर, पनि आयातमा नियन्त्रण नहुँदा अब एलसी खाेल्न नै कडाइ गर्न आग्रह गरेकाे छ ।