पहिला प्रचण्डले संरक्षण गरेका ‘आपराधिक’ पृष्ठभूमी भएकाहरू ओली कित्तामा उभिनुको कारण

काठमाडौं– नेपाल कम्युनिस्ट पार्टी (नेकपा)भित्र प्रधानमन्त्री केपी शर्मा ओली र अध्यक्ष पुष्पकमल दाहाल प्रचण्ड समूहबीच नेताको ‘हेराफेरी’ गज्जबको देखिएको छ।

एकले अर्काको गुटका नेता चोर्ने र अवसर दिने क्रम निरन्तर चलिरहेको छ। पूर्वएमालेबाट साथ दिएका नेता माधवकुमार नेपाललाई प्रचण्डले अध्यक्षको जिम्मेवारी दिए भने पूर्वमाओवादी छाड्नेलाई ओलीले मन्त्री पद उपहारमा दिए।

प्रतिनिधि सभा विघटनपछि नेकपामा देखिएको विचलनका क्रममा यी मात्रै होइन, अनेक विचित्रका चित्र देखा परेका छन्। पार्टीको सिद्धान्तर र फूटको कारण पदीय दाउपेच रहेको भन्ने नेताहरूका आरोप प्रत्यारोपले पुष्टि गरिसकेको छ। प्रधानमन्त्री ओलीलाई कारबाही गरी नेपाललाई अध्यक्ष दिनु प्रचण्डको सैद्धान्तिक नभई रणनीतिक अभ्यास थियो। यस्तै, पूर्वमाओवादी छाडेका टोपबहादुर रायमाझीदेखि प्रभु साहसम्मलाई मन्त्री पद दिनु ओलीको अर्को रणनीति बन्यो।

दुवै समूहले आफ्नो आधिकारिकता रहेको दाबी गरेका छन्। तर यहि क्रममा केही विचित्रका पात्र ओली कित्तामा उभिएका छन्। काशी तिवारी हत्या प्रकरणको अभियोग लागेका प्रभु साह त मन्त्री नै भए। यीबाहेक उज्जनकुमार श्रेष्ठ हत्या प्रकरणमा सजाय नै भुक्तान गरेका बालकृष्ण ढुंगेल, आपराधिक गतिविधिमा संलग्न रहेका पहिलो संविधानसभा निर्वाचनमा बिजय नै हासिल गरेका बबन सिंहसम्म ओली कित्तामा उभिएका छन्।

किन?

प्रधानमन्त्री ओलीले भ्रष्टाचार र अपराध गरेका कतिपयलाई कारबाही गर्ने नीति अख्तियार गर्ने छाँट देखेपछि यस्ता पात्रले राजनीतिक शरण लिएको हुनसक्ने कतिपयको आशंका छ। ‘अब मुलुकको गति नै अपराधविरुद्धको यात्रा बनाउने प्रधानमन्त्रीको निर्देशनमा चल्न सक्ने भएपछि आफूलाई जोगाउन पनि यस्ता पात्रले ओलीको कित्तामा उभिएको घोषणा गरेका हुन्’, स्रोतले भन्यो।

बबन सिंहलाई रौतहटमा प्रभु साहले एउटा विशाल कार्यक्रम गरेर भित्राएका थिए भने ढुंगेलले प्रचण्डमा क्रान्तिलाई भ्रान्तिमा परिणत गरेको भन्ने आरोप लगाएर ओलीको साथ दिने बताएका थिए। ढुंगेल ओली समूहले विस्तार गरेको केन्द्रीय समितिका सदस्य बनिसकेका छन्। बबन सिंह भने जनता समाजवादी पार्टी छाडेर आएका हुन्।

‘यी पात्र राजनीतिक रुपमा पहिला पनि कुनै न कुनै दल र समूहमा थिए। ओली समूहमा आउनासाथ आपराधिक मात्रै भए भन्नु गलत ठहर्छ’, बालुवाटार स्रोतले भन्यो,‘त्यसअघि कस–कसले संरक्षण गरेर राखेका थिए, कस–कसको सत्तारोहणले बचाएको थियो भन्ने हेक्का राख्नुपर्छ।’

राजनीतिमा कहिँ न कहिँ योगदान रहेका कारण नै स्वागत गरिएको ओली पक्षका नेताहरूको दाबी छ। ‘प्रधानमन्त्रीले समाजमा रहेका प्रवित्तिको रुपान्तरणको यात्रा लिनु भएको छ, जो जस्तो पृष्ठभूमीबाट आए पनि उहाँहरूलाई रुपान्तरण गर्दै, रुपान्तरणका निम्ति खटाइनेछ’, बालुवाटार स्रोतले भन्यो।

यीनै पात्रलाई पहिला प्रचण्डलगायतका अन्यले उपयोग गरेका थिए। प्रचण्डले धोका दिएका कारण पनि ओली समूहमा उनीहरू आउनुको कथा रोचक नै छ। कार्की ब्याङ्क्वेटमा भएको एउटा कार्यक्रममा ओलीले प्रचण्डले उपयोग गरेका पात्रका बारेमा चिन्ता देखाएका थिए। ‘खोई कहाँ छन् कालीबहादुर खामहरू? प्रचण्डले प्रयोग गरेका होइनन्?’, ओलीको चासो थियो।