फेरि बढ्यो देशभरि वायु प्रदुषण, काठमाडौं विश्वमै चौंथो नम्बरमा

काठमाडौं –  पछिल्लो दुई दिनयता काठमाडौं उपत्यकासहित देशका विभिन्न सहरमा वायु प्रदूषण बढेको छ । एयर क्वालिटी इन्डेक्सअनुसार आजको  एयर क्वालिटी इन्डेक्स एक्यूआई(पीएम) २१३ पुगेको छ ।

कीर्तिपुरस्थित त्रिभुवन विश्वविद्यालयको एक्युआई १५२ छ। हावामा प्रदुषणको मात्रा बढेसँगै काठमाडौं संसारमै प्रदुषित हावा भएको सहरमा चौंथो नम्बरमा परेको छ। विश्व स्वास्थ्य संगठनकाअनुसार एक्यूआई ६० भन्दा बढी रहेको वातावरण मानव स्वास्थ्यका लागि घातक हुँदै जान्छ । अहिलेको प्रदूषणको मुख्य कारक वन डढेलो भएको वातावरण विभागले जनाएको छ ।

स्विट्जरल्याण्डको आइक्युएयरका अनुसार काठमाडौंभन्दा अघि भियतनामको हनोई, बंगलादेशको ढाका र भारतको मुम्बई छन्। वातावरण विभागका प्रवक्ता शंकरप्रसाद पौडेलले जंगलमा लागेको डढेलोले हावामा धुँवा मिसिएको, बेस्सरी हावा नचलेको र पानी पनि नपरेका कारण प्रदुषण बढेको बताए।

वायु प्रदूषणको असरबाट जोगिन मास्कको अनिवार्य प्रयोग गर्न र अन्य सुरक्षाका उपाय अपनाउन चिकित्सकहरूले सुझाव दिएका छन् । साथै अहिलेको ‘एन्टी अक्सिजन पोलुसन’ले बालबालिका र वृद्धवृद्धाको स्वाथ्यमा छिटो असर पुर्‍याउने भएकाले सजग रहन पनि उनीहरूको सुझाव छ ।