नेपाललाई १६९ रनको लक्ष्य
कागजपत्र |
काठमाडौं – नेपालले युएईसँगको खेलमा १६९ रनको लक्ष्य पाएको छ ।
आईसीसी क्रिकेट विश्वकप लिग- २ अन्तर्गत त्रिकोणात्मक एकदिवसीय शृंखला अन्तर्गतको संयुक्त अरब इमिरेट्स (यूएई) सँग जारी खेलमा पहिले ब्याटिङ गरेको युएईले ४६.३ ओभरमा १६८ रन बनाउँदा १० विकेट गुमाएपछि नेपालले जितका लागि ५० ओभरमा १६९ रनको लक्ष्य पाएको हो ।
नेपालका लागि सोमपाल कामीले ९ ओभरमा ३९ रन खर्चँदै ४ विकेट हात पारे भने करण केसीले ७.३ ओभरमा १ मेडनसहित १६ रन खर्चँदै ३ विकेट हात पारे ।
त्यस्तै नेपालका लागि कप्तान सन्दीप लामिछानेले १० ओभरमा १ मेडन राख्दै ३० रन खर्चिएर १ विकेट लिएका थिए ।
नेपालका लागि दिपेन्द्रसिंह ऐरी र सागर ढकालले पनि १÷१ विकेट लिएका थिए ।
युएईका लागि चुन्दनगोपायी रिजवाल र रोहन मुस्तफाले ४०÷४० रन बनाए भने मोह्ममद वासिमले २१ रनको पारी खेले । त्यस्तै कशिफ दाउदले १८ रन र बसिल हमिदले १४ रन बनाउँदा कप्तान अहमद राजाले १३ रन बनाएका थिए ।
नेपालले केही बेरमा १६९ रनको लक्ष्यसहित ब्याटिङका लागि मैदानमा उत्रँदैछ ।
नेपाल शृंखलामा लगातार दोस्रो जित निकाल्ने दाउमा छ । पहिलो खेलमा नेपालले पीएनजीलाई २ विकेटले हराएको थियो ।
यूएई समेत लगातार दोस्रो जित निकाल्ने योजनामा छ । उसले पहिलो खेलमा पीएनजीलाई नै ७ विकेटले पराजित गरेको थियो ।
हालसम्म नेपाल र यूएई एकदिवसीय अन्तर्राष्ट्रियमा चार पटक आमने—सामने भएका छन् । जसमा नेपाल र यूएई दुबैले समान २ पटक जित हात पारेका छन् ।
लिगमा यूएई १५ खेलमा ८ जित निकाल्दै १८ अंकका साथ दोस्रो स्थानमा छ । नेपाल भने ९ खेलमा १० अंक जोडेर छैटौं स्थानमा छ ।
