बैंक तथा वित्तीय संस्थाहरुको निक्षेप एकैदिन ४ अर्बले घट्यो

काठमाडौँ – बैंक तथा वित्तीय संस्थाको निक्षेप संकलन एकै दिन ४ अर्ब रुपैयाँ  घटेको छ । नेपाल राष्ट्र बैंकका अनुसार चैत १ गतेको दिन बैंक तथा वित्तीय संस्थाको सो निक्षेप संकलन घटेको हो । एकैदिन ४ अर्ब निक्षेप घटेसँगै बैंक तथा वित्तीय संस्थाहरुको कुल निक्षेप ४८ खर्ब ९७ अर्ब रुपैयाँ पुगेको छ । गत फागुन ३० गतेसम्म कुल निक्षेप ४९ खर्ब १ अर्ब रुपैयाँ रहेको थियो ।

गत फागुन ३० गते वाणिज्य बैंकको कुल निक्षेप ४३ खर्ब ३३ अर्ब रुपैयाँ रहेकोमा ४ अर्ब घटेसँगै निक्षेप घढेर ४३ खर्ब २९ अर्ब रुपैयाँ पुगेको छ । चैत १ गतेसम्म मा बैंक तथा वित्तीय संस्थाको कर्जा लगानी स्थीर देखिएको छ । कर्जा लगानी ४६ खर्ब ९६ अर्ब रुपैयाँ नै रहेको छ । गत फागुन ३० गतेसम्म कुल कर्जा लगानी ४६ खर्ब ९८ अर्ब रुपैयाँ रहेको थियो ।

चैत १ गतेसम्ममा बैंकहरुको औसत सीडी रेसियोमा सामान्य सुधार भएर ९०.५४ प्रतिशत कायम भएको छ । गत फागुन ३० गतेसम्म बैंकहरुको औसत सीडी रेसियो ९०.४७ प्रतिशत थियो । त्यस्तै अन्तर बैंक सापटीको ब्याजदर ६ दशमलव ९९ प्रतिशत रहेको छ ।