भारतले प्याज निर्यातमा लगाए प्रतिबन्ध हटायो

नयाँदिल्ली – भारतले गत भदौ २९ गते (१४ सेप्टेम्बर) मा प्याजको विदेश निर्यातमा लगाएको प्रतिबन्ध करिब चार महिनापछि हटाएको छ । भारतको वाणिज्य तथा उद्योग मन्त्रालयले सोमबारदेखि यसअघिको नीतिमा संशोधन गर्दै १ जनवरीदेखि निर्यात खुला गर्ने निर्णय गरेको हो ।

मन्त्रालयअन्तर्गतको वैदेशिक व्यापार महानिर्देशनालयद्वारा सोमबार परिपत्र जारी गर्दै ‘१ जनवरी २०२० देखि लागू हुने गरि सबै जातका प्याजको निर्यात खुला गरिएको जनाएको छ । आन्तरिक उत्पादन कम गएका कारण मूल्य अकासिँदै गएपछि भारतले प्याजको विदेश निर्यातमा रोक लगाएको थियो ।

नेपालमा खपत हुने प्याजको ९० प्रतिशतभन्दा बढी भारतबाट आयात हुने गरेका कारण प्याजमा भारतले लिने नीतिले नेपालको बजार पनि प्रत्यक्ष प्रभावित हुने गरेको छ । नेपालमा भारतबाट मात्र वार्षिक ३ अर्बभन्दा बढीको प्याज आयात हुँदै आएको छ । त्यही कारण भारतको निर्यातमा रोक निर्णयले नेपालमा पनि प्याजको भाउ अकासिएको थियो ।

दसैंतिहारजस्ता प्रमुख चाड नजिकिँदै गर्दा भारतले निर्यातमा रोक लगाउँदा आम नेपाली उपभोक्ता समस्यामा परेका थिए । त्यसबाहेक खुला सीमा भएका कारण निर्यातमा रोक लाग्दा चोरी पैठारीसमेत बढ्ने गरेको छ । यसले आम उपभोक्तालाई भन्दा पनि बिचौलियाहरूलाई बढी फाइदा पुग्ने गरेको देखिन्छ ।