कच्चा पदार्थमा लगाइने कर कटौती गर्न सरकारसँग उद्योगीको माग

काठमाडौं – उद्योग संगठन मोरङले कच्चा पदार्थलगायत उत्पादनका क्रममा प्रयोग हुने वस्तुमा लगाइने कर कटौती गर्न माग गरेको छ । सोमवार विज्ञप्ति जारी गर्दै अन्तर्राष्ट्रिय अभ्यासअनुसार बजारमा वस्तुको मूल्यवृद्धि भएका बेला आमउपभोक्तालाई राहत दिन स्थिति सहज नहुन्जेल कर कटौती गर्नुपर्ने संगठनले माग गरेको हो ।

संगठनले उद्योग व्यवसाय, आमउपभोक्तालाई समेत राहत दिने नीति तत्काल अवलम्बन गर्न सरकारसँग अनुरोधसमेत गरेको छ ।  पेट्रोलियम पदार्थको मूल्यवृद्धि, रुस–युक्रेन युद्ध, डलरको पढ्दो विनिमय दरका कारण खानेतेल, उपभोग्य वस्तु, खाद्यसामग्री, निर्माण सामग्रीलगायत वस्तुको मूल्य निरन्तर उकालो लागिरहेको छ ।

संगठनले भनेको छ ‘खाने तेल उत्पादन गर्ने उद्योगहरुको मुख्य कच्चा पदार्थ सोयाबिन, सनफ्लावर र पामको कच्चा तेल तथा तोरीको दाना ब्राजिल, अर्जेन्टिना, क्यानाडा, अस्ट्रेलिया, युक्रेन लगायत देशहरुबाट यसअघि जनवरीमा १ हजार ५२५ डलर प्रति मेट्रिक टनमा आयात भइरहेकोमा हाल आएर २१२५ डलरसम्म खर्च गर्नुपरेको छ ।’

इन्धनमा भइरहेको मूल्य वृद्धिले तेस्रो मुलुकदेखि उद्योगसम्मको ढुवानी भाडा बढेको र बैंकहरुको बढ्दो ब्याजले लागत महँगो भएको उद्योग संगठन मोरङको भनाइ छ । देशका अधिकांश स्वदेशी उद्योगहरु विदेशी कच्चा पदार्थमा निर्भर रहेकाले अन्तर्राष्ट्रिय बजारमा कच्चा पदार्थको मूल्यमा उतार चढाव आउँदा त्यसको प्रत्यक्ष प्रभाव स्वदेशी उद्योगको उत्पादनमा पर्ने गरेको संगठनले जनाएको छ ।

बजारमा वस्तुको मूल्य वृद्धि भएको अवस्थामा अन्तर्राष्ट्रिय अभ्यासअनुसार सरकारले कच्चा पदार्थ लगायत उत्पादनको क्रममा प्रयोग हुने वस्तुमा लगाउँदै आएको करमा कटौती गरी आम उपभोक्तालाई राहत दिने प्रचलन रहेको स्मरण गराइएको छ । नेपालमा पनि स्थिति सहज नहुन्जेलसम्म सोही अनुरुपको अभ्यासलाई कार्यान्वयनमा ल्याउन संगठनले माग गरेको छ ।