ओलीका पालामा भएका संवैधानिक निकायका नियुक्ति खारेज गर्न गठबन्धनमा प्रचण्डको प्रस्ताव

काठमाडौं– सत्ता गठबन्धनको बैठकमा नेकपा माओवादी केन्द्रका अध्यक्ष पुष्पकमल दाहाल प्रचण्डले एमाले अध्यक्ष केपी शर्मा ओली सरकारले अध्यादेशमार्फत नियुक्त गरेका संवैधानिक आयोगका पदाधिकारी नियुक्ति खारेज गर्न प्रस्ताव गरेका छन्।

प्रधानमन्त्री शेरबहादुर देउवाको सरकारी निवास बालुवाटारमा भएको गठबन्धनको बैठकमा प्रचण्डको उक्त प्रस्तावमा सबैले सहमति जनाएको उच्च स्रोतले दाबी गरेको छ।

अध्यादेशमार्फत संवैधानिक परिषदको कानुन संशोधन गरी उपस्थित मध्येका बहुमत सदस्यको निर्णयका आधारमा संवैधानिक आयोगका पदाधिकारी नियुक्ति गर्ने व्यवस्था अनुसार ओलीले निर्णय गराएका थिए।

सो क्रममा अख्तियार दुरुपयोग अनुसन्धान आयोगदेखि अन्य विभिन्न संवैधानिक निकायमा विभिन्न नियुक्ति गरिएको थियो। उच्च स्रोतका अनुसार संवैधानिक परिषदको बैठक डाकेर प्रधानमन्त्री देउवाले गठबन्धनमा भएको सहमतिका आधारमा नियुक्ति खारेजीको निर्णय गर्न सक्छन्। ति आयोगहरुमा नयाँ नाम पठाउने तयारी भएको हो।

सत्ता गठबन्धनको बैठकमा प्रधानमन्त्री देउवा, प्रचण्ड, एमाले नेता माधवकुमार नेपाल, जसपा अध्यक्ष उपेन्द्र यादव र राष्ट्रिय जनमोर्चा अध्यक्ष चित्रबहादुर केसी सहभागी थिए।