भरतपुरमा ट्रक र स्कुटर ठोक्किँदा दुई जनाको मृत्यु
कागजपत्र |
चितवन – चितवनको भरतपुर –१५ स्थित अतिथि पार्टी प्यालेस नजिकै ट्रकको पछाडि स्कुटर ठोक्किँदा दुई जना युवाको मृत्यु भएको छ।
भरतपुरबाट रामपुरतर्फ जाँदै गरेको ना ५ ख ५८१६ नम्बरको ट्रकमा सोही दिशातर्फ गइरहेको बा.प्र.०६००४ प ७२४८ नम्बरको स्कुटर पछाडिबाट ठोक्किँदा उक्त दुर्घटना भएको हो।
दुर्घटनामा स्कुटर चालक भरतपुर–२६ दिव्यनगर बस्ने २२ वर्षीय अशोक भण्डारी र स्कुटरको पछाडि सवार लमजुङ घर भई हाल भरतपुर–२० बस्ने १९ वर्षीय राजिब गुरुङ गम्भीर घाइते भएका थिए।
घाइते दुवै जनालाई तत्काल उपचारका लागि अस्पताल पुर्याइएको भए पनि उपचारकै क्रममा आज बिहान २:४० बजे उनीहरूको मृत्यु भएको प्रहरीले जनाएको छ।
दुर्घटनालगत्तै प्रहरीले ट्रक चालक मकवानपुरको राक्सिराङ–३ बस्ने २७ वर्षीय बाबुलाल थोकरलाई नियन्त्रणमा लिएको छ।
प्रहरीले नियन्त्रणमा रहेका चालकमाथि सोधपुछ गर्दै घटनाबारे थप अनुसन्धान अगाडि बढाएको छ।
