भुटानविरुद्ध नेपालको शानदार जित

काठमाडौं – एसीसी महिला प्रिमियर कपमा भुटानविरुद्ध नेपालले शानदार जित हात पारेको छ । नेपालले दिएको ११४ रनको लक्ष्य पछ्याएको भुटानले २० ओभरमा ८ विकेटको क्षतिमा ६२ रन बनाएपछि नेपाल ५१ रनले विजयी भएको हो ।

बिहीबार मलेशियाको क्वालम्पुरस्थित कोलेज तुआन्कु जाफर ओभलमा भएको खेलमा भुटानका लागि दिचेन वाङ्मोले ३९ रन बानएकी थिइन् ।

त्यस्तै चाडो ओमले ११ रन बनाउँदा अन्य ब्याटरले दोहोरो अंकमा रन जोड्न सकेनन् ।

नेपालका लागि रुविना क्षेत्रीले ४ ओभरमा १६ खर्चँदै ३ विकेट लिइन् ।

त्यसअघि टस हारेर पहिले ब्याटिङ गरेको नेपालले २० ओभरमा ११३ रन बनाएका थियो नेपालका लागि सिता राना मगरले ३७ रन बनाएकी थिइन् । त्यस्तै रुविना क्षेत्रीले २४ रन बनाएकी थिइन् ।

नेपालले पहिलो खेलमा कतारलाई ८ विकेटलाई हराएको थियो ।