‘फ्री भिसा’को नाममा ठगी गर्ने दुई जना पक्राउ
कागजपत्र |
काठमाडौं- वैदेशिक रोजगारीका लागि मलेसिया पठाउने भन्दै ठगी गरेको आरोपमा दुई जना पक्राउ परेका छन्।
‘फ्री भिसा, फ्री टिकट’ मा मलेसिया पठाउने प्रलोभन देखाएर रकम असुल्ने कार्यमा संलग्न भएको आरोपमा ४१ वर्षीया रन्जु कुमारी शाह र ३८ वर्षीय माइती माया थोकरलाई प्रहरीले पक्राउ गरेको हो।
प्रहरीका अनुसार उनीहरूले स्वास्थ्य परीक्षण र प्रहरी रिपोर्टको बहानामा १५२ जनाबाट प्रतिव्यक्ति १२ हजार रुपैयाँका दरले रकम असुलेका थिए। साथै पीडितहरूको सक्कल राहदानी समेत संकलन गरी पछि सम्पर्कविहीन भएको पाइएको छ।
बेरोजगार युवायुवतीलाई आकर्षक तलबको प्रलोभन देखाएर विदेश पठाइदिने भन्दै रकम उठाई ठगी गरेको भन्दै पीडितहरूले उजुरी दिएका थिए। सोही उजुरीका आधारमा काठमाडौँ उपत्यका अपराध अनुसन्धान कार्यालयबाट खटिएको टोलीले उनीहरूलाई पक्राउ गरेको हो।
हालसम्म १५२ जनाबाट रकम संकलन गरिएको पाइएको छ भने ३५ जना पीडित सम्पर्कमा आएका प्रहरीले जनाएको छ।
