वास्तविक सुकुमबासी पहिचान नगरी हटाउनु गलत : महामन्त्री पौडेल

काठमाडौं –  नेपाली कांग्रेसका महामन्त्री प्रदीप पौडेलले सुकुमबासी बस्ती हटाउँदा पर्याप्त सूचना र समय नदिइएको भन्दै सरकारको कार्यशैलीप्रति असन्तुष्टि जनाएका छन्।

उनले पूर्वसूचना र तयारीबिनै डोजर प्रयोग गर्नु न मानवीय भएको बताए न त व्यवहारिक नै भएको उनको भनाइ थियो। सुकुमबासीको समस्या जटिल र संवेदनशील भएकाले त्यसलाई बल प्रयोग गरेर होइन, योजनाबद्ध तरिकाले समाधान गर्नुपर्ने उनले स्पष्ट पारे।

महामन्त्री पौडेलले सुकुमबासी बस्तीमा वास्तविक सुकुमबासी नभई ‘हुकुमबासी’ मात्र बसोबास गरेको भन्ने प्रचारलाई अस्वीकार गरे। उनले वास्तविक सुकुमबासीको पहिचान गरी उचित पुनर्स्थापनाको व्यवस्था नगरी बस्ती हटाउनु गलत हुने धारणा राखे।

पाल्पा क्षेत्र नम्बर १ बाट नेपाली कांग्रेसका तर्फबाट निर्वाचित सांसद सन्दीप रानालाई बधाई तथा शुभकामना दिन काठमाडौँमा आयोजित कार्यक्रममा बोल्दै उनले वर्तमान राजनीतिक परिस्थितिमा कांग्रेस सांसदहरूको भूमिका अझ जिम्मेवार हुनुपर्ने उल्लेख गरे।

उनले भने, “झण्डै दुई तिहाइको सरकार छ। संख्याको बलमा कतिपय गलत कामसमेत गरिन सक्छ। त्यसको डटेर सामना गर्नुपर्छ, जनतालाई बुझाउन सक्नुपर्छ।” उनले सांसद रानालाई सक्रिय, अनुकरणीय र जनतामाझ देखिने भूमिकामा रहन शुभकामना पनि व्यक्त गरे।

यस्तै, उनले संवैधानिक परिषद्को पुनर्संरचना एकपक्षीय ढंगले गर्नु उपयुक्त नभएको बताए। परिषद्लाई सर्वपक्षीय र सन्तुलित बनाउनु राज्यको आधारभूत मर्मभित्र पर्ने विषय भएकाले लोकतान्त्रिक मूल्य–मान्यता कमजोर पार्ने कुनै पनि कदमप्रति सरकार सचेत हुनुपर्नेमा उनले जोड दिए।