निगमको मूल्यवृद्धिपछि ५ हजारभन्दा बढीले बढ्यो हवाई भाडा

काठमाडौं- नेपाल आयल निगमले आन्तरिक हवाई इन्धनको मूल्यमा भारी वृद्धि गरेसँगै वायुसेवा कम्पनीहरूले यात्रुबाट उठाइने इन्धन शुल्क उल्लेख्य रूपमा बढाएका छन् ।

निगमले बुधबार बिहानदेखि लागू हुने गरी इन्धनको मूल्य प्रतिलिटर १२४ रुपैयाँले बढाएपछि आन्तरिक वायुसेवाले इन्धनवापतको शुल्क अधिकतम ५ हजार ४ सय ५३ रुपैयाँसम्म बढाएका हुन् ।

वायुसेवा कम्पनीका अनुसार सबैभन्दा बढी प्रभाव काठमाडौं–धनगढी उडानमा परेको छ । इन्धन शुल्क हवाई भाडासँगै जोडिने भएकाले यात्रुले टिकटमै थपिएको मूल्य तिर्नुपर्ने भएको छ । बुधबारदेखि नै यात्रुले बढेको शुल्कसहितको हवाई भाडा तिर्न थालेका छन् ।

पर्वतीय उडानमा सबैभन्दा बढी ४ हजार २२५ रुपैयाँसम्म इन्धन शुल्क बढेको छ । नियमित सहरी गन्तव्यमध्ये सिमरा उडानमा सबैभन्दा कम वृद्धि देखिएको छ, जहाँ १ हजार ११० रुपैयाँसम्म भाडा बढाइएको छ ।

वायुसेवा कम्पनीहरूले बढाइएको इन्धन शुल्क १३ प्रतिशत मूल्य अभिवृद्धि कर (भ्याट) सहित लागू गरिएको जानकारी दिएका छन् ।