रास्वपा र राप्रपाद्वारा संसद बैठक बहिष्कार

काठमाडौं– राष्ट्रिय स्वतन्त्र पार्टी (रास्वपा) र राप्रपा दुवैले शुक्रबारको प्रतिनिधिसभा बैठक बहिष्कार गरेका छन्। भिजिट भिसा दुरुपयोग प्रकरणमा छानबिनको माग गर्दै आएका रास्वपाका सांसदहरू प्रधानमन्त्रीसँग प्रत्यक्ष संवाद गर्न चाहन्थे। तर, प्रतिनिधिसभामा प्रश्नोत्तर कार्यक्रम कार्यसूचीबाट हटाइएपछि दुवै दलका सांसदहरूले बैठक बहिष्कार गर्ने निर्णय गरेका हुन्।

रास्वपाले प्रधानमन्त्रीसँग कुराकानी गर्न चाहेपनि सभामुख देवराज घिमिरेले प्रश्नोत्तर कार्यक्रम स्थगित गरेका थिए। बैठक प्रारम्भसँगै रास्वपा र राप्रपाका सांसदहरूले आ–आफ्नो स्थानबाट उभिएर विरोध जनाएका थिए। सभामुखले बस्न आग्रह गरे पनि उनीहरूले अस्वीकार गर्दै नाराबाजी जारी राखे।

प्रधानमन्त्री केपी शर्मा ओली बैठक कक्षबाट बाहिरिएपछि रास्वपाका सांसदहरूले पनि बैठक बहिष्कार गरेका थिए। रास्वपाका कार्यवाहक प्रवक्ता मनिष झाका अनुसार, प्रधानमन्त्रीले आफूहरूका कुरा सुन्न नचाहेपछि उनीहरूले बैठक छाड्ने निर्णय गरेका हुन्। “हामी प्रधानमन्त्रीज्यूलाई हाम्रो कुरा सुनाउन चाहन्थ्यौं तर उहाँले सुनिदिनु भएन,” झाले भने, “त्यसैले हामीले बैठक बहिष्कार गरेका हौं।”

रास्वपाका सांसदहरू शुक्रबारको बैठकमा कालो पोशाक र नीलो रिबनसहित उपस्थित भएका थिए। उनीहरूले सरकारको उपेक्षाविरुद्ध सांकेतिक विरोध समेत गरेका थिए। यता, राप्रपाले पनि संसदमा समान धारणा राख्दै विरोधमा उभिएको थियो।

बैठक बहिष्कारका बीच प्रतिनिधिसभामा मन्त्रालयगत बजेटमाथिको छलफल भने जारी रहेको छ। सभामुख घिमिरेले प्रश्नोत्तर कार्यक्रम हटाएको जानकारी दिएपछि कार्यसूचीअनुसारको अन्य बहस अघि बढाइएको हो।