रविन्द्र मिश्रलाई थुनामा राख्नुको कारण स्पष्ट पार्न सरकारलाई सर्वोच्चको निर्देशन

काठमाडौं— सर्वोच्च अदालतले राष्ट्रिय प्रजातन्त्र पार्टी (राप्रपा)का उपाध्यक्ष रविन्द्र मिश्रलाई थुनामा राख्नुको कारण स्पष्ट पार्न सरकारलाई आदेश दिएको छ। न्यायाधीश सुनिलकुमार पोखरेलको एकल इजलासले मंगलबार मिश्रको थुनाबारे ‘कारण देखाउ आदेश’ जारी गर्दै उनलाई बन्दीसहित अदालतमा पेश गर्न भनेको हो।

मिश्रको तर्फबाट उनकी पत्नी सरिका कार्कीले बन्दीप्रत्यक्षीकरण रिट दायर गरेकी थिइन्। रिटमा मिश्रलाई गैरकानुनी रूपमा थुनामा राखिएको दाबी गरिएको छ।

गत चैत्र १५ गते काठमाडौँको तीनकुनेमा राजावादी समूहद्वारा आयोजित प्रदर्शनमा सहभागी भएको आरोपमा मिश्रलाई प्रहरीले पक्राउ गरेको थियो। उक्त प्रदर्शन हिंसात्मक बनेपछि एक पत्रकारसहित दुईजनाको ज्यान गएको थियो भने सार्वजनिक सम्पत्तिमा ठूलो क्षति पुगेको थियो।

उक्त घटनासँग सम्बन्धित रहेर पक्राउ परेका राप्रपाका महामन्त्री धवलशमशेर राणा र स्वागत नेपाल भने हाजिरी जमानीमा रिहा भइसकेका छन्।

प्रहरीले मिश्रमाथि राज्यद्रोह, संगठित अपराध र आपराधिक उपद्रवसम्बन्धी अभियोगमा अनुसन्धान गरिरहेको जनाएको छ। अदालतले अब सरकारबाट उनको थुनाबारे स्पष्ट जवाफ मागेको छ।