प्रमुख प्रशासकीय अधिकृत गुरागाईंलाई छेक्न महानगरमा नगरप्रहरी परिचालन

काठमाडौं- काठमाडौँ महानगरपालिकामा प्रमुख प्रशासकीय अधिकृत सरोज गुरागाईंलाई हाजिर गराउन नदिने निर्णयसँगै नगर प्रहरी तैनाथ गरिएको छ । कार्यालयमा केही कर्मचारी र वडाध्यक्षहरू उपस्थित भए पनि वातावरण तनावग्रस्त बनेको छ । प्रमुख प्रशासकीय अधिकृतको कार्यकक्षमा महानगरीय प्रहरीले ताला लगाएको छ ।

महानगरपालिकाका कर्मचारीहरूले गुरागाईंको निरन्तरताको माग गरेका छन् । कार्यालयमा एकतर्फ कर्मचारीहरु प्रमुख प्रशासक अधिकृतको स्वागतका लागि जम्मा भएका छन् भने अर्कोतर्फ मेयरले नगर प्रहरी तैनाथ गरेका छन्, जसले गर्दा यहाँ एक विवाद उत्पन्न भएको छ ।

कर्मचारीहरुले ५ महिनादेखि तलब नपाएको र महानगरको काम ठप्प भएको कारण प्रमुख प्रशासकीय अधिकृतलाई हाजिर गराउन चाहेका छन् । मेयर बालेन शाहले काठमाडौं टावरको नक्सा पासमा अनियमितता गरेको आरोपमा गुरागाईंलाई अघोषित निलम्बनमा राखेका थिए । उनलाई कार्यालय प्रवेश गर्न निषेध गरेका थिए ।

मेयर शाहले गुरागाईंलाई हटाएर नयाँ प्रमुख प्रशासकीय अधिकृत नियुक्त गर्न चाहेका थिए, तर कुनै पनि आरोप पुष्टि नहुँदा सरकारले उनलाई हटाउन इन्कार गर्‍यो । संघीय मामिला तथा सामान्य प्रशासन मन्त्रालयले गुरागाईंलाई निरन्तरता दिँदा मेयर शाह आक्रोशित भएका छन् र उनले सामाजिक सञ्जालमार्फत आफ्नो असन्तुष्टि व्यक्त गरेका छन् ।