तलब नपाएको भन्दै त्रिभुवन विमानस्थलका सरसफाइकर्मी आन्दोलित

काठमाडौं-  त्रिभुवन अन्तर्राष्ट्रिय विमानस्थलका सरसफाइकर्मी कर्मचारीहरू तलब नपाएको विरोधमा आन्दोलनमा उत्रिएका छन् । आन्दोलनका कारण आन्तरिक टर्मिनल क्षेत्रमा फोहर संकलन नहुँदा दुर्गन्ध फैलिएको छ ।

विगत दश दिनदेखि तलब माग्दै आन्दोलनरत कर्मचारीहरूले फोहर नउठाउँदा यात्रुहरू असहज महशुस गरिरहेका छन् । विमानस्थलमा रहेका यात्रु हरिस क्षेत्रीले भने, “जहाँतहीँ फोहरको थुप्रो छ, दुर्गन्ध फैलिएको छ, काम गरेको पारिश्रमिक पाउनु त अधिकार हो ।”

विमानस्थलका महाप्रबन्धक जगन्नाथ निरौलाले तलब निकासाका लागि नेपाल नागरिक उड्डयन प्राधिकरणको सञ्चालक समितिमा पत्राचार गरिए पनि निर्णय नआएको कारण तलब दिन नसकिएको बताए ।

सरसफाइकर्मीहरूले आन्दोलन जारी राख्दा विमानस्थलको सरसफाइमा समस्या थपिँदै गएको छ ।