आज पनि काठमाडौं उपत्यकाको वायु प्रदूषण उच्च

काठमाडौं – पछिल्ला केही दिनदेखि काठमाडौं उपत्यकामा वायु प्रदूषण उच्च रहँदै आएको छ । स्वीस कम्पनी आइक्यू एअरले गरेको मापनअनुसार काठमाडौं विश्वको दोस्रो सबैभन्दा प्रदूषित शहर बनेको छ ।

हाल उपत्यकाको औसत वायु गुणस्तर सूचक (एक्यूआई) ३७५ पुगेको छ, जसलाई खतरनाक श्रेणीमा राखिएको छ । विश्वका प्रदूषित शहरहरूमा पहिलो स्थानमा इराकको बग्दाद रहेको छ, जहाँ एक्यूआई ६४७ मापन गरिएको छ । नेपालपछि भारतको दिल्ली तेस्रो स्थानमा रहेको छ, जहाँ एक्यूआई १९९ छ ।

मौसमविद् बिनु महर्जनका अनुसार वायु प्रदूषणका कारण उपत्यकामा लागेको बाक्लो बादल हट्न अझै केही दिन लाग्नेछ । तर, शुक्रबारदेखि वायुप्रवाह केही तीव्र हुने भएकाले क्रमशः सुधार आउने र आकाश खुल्दै जाने सम्भावना रहेको उनले बताइन् ।

उनका अनुसार हाल काठमाडौं उपत्यकामा वर्षाको सम्भावना छैन, तर बादल क्रमशः हट्ने संकेत देखिएको छ । बुधबारको तुलनामा बिहीबार तापक्रम केही घटेको र भोलिदेखि क्रमशः बढ्ने उनले जानकारी दिइन् ।