एक प्रोफेसरको कालो कर्तुत: ५९ छात्रालाई यौन शोषण गर्दै बनाए भिडियो

काठमाडाैं- भारतकाे उत्तर प्रदेशस्थित हाथरसको पीसी बागला डिग्री कलेजका भूगोल विभाग प्रमुख डा. रजनीश विरुद्ध छात्राहरूसँग यौन शोषणको आरोप लागेको छ । यी आरोपहरूमा डा. रजनीशले आफ्नै मोबाइलबाट करिब ५९ अश्लील भिडियो रेकर्ड गरेका थिए, जुन हालसालै भाइरल भएका छन्।

प्रहरी अनुसन्धानमा यी भिडियोहरू मध्ये केही अश्लील वेबसाइटहरूमा अपलोड गरिएको पत्ता लागेको छ । आरोपी प्रोफेसरको खोजी जारी छ र यस मामलामा अनुसन्धानका लागि तीन वटा टोली गठन गरिएको छ ।

एक महिना अघि, केन्द्रीय महिला आयोग र प्रहरी प्रशासनलाई एक गुमनाम उजुरी पत्र प्राप्त भएको थियो, जसमा डा. रजनीश विरुद्ध यौन शोषणका गम्भीर आरोप लगाइएका थिए । उक्त पत्रसँगै १२ वटा फोटोहरू पनि पठाइएका थिए, जसमा प्रोफेसरलाई कलेजको अफिसमा छात्राहरूसँग अश्लील क्रियाकलापमा संलग्न देखाइएको थियो । यद्यपि, कलेज प्रशासनले प्रहरीलाई कुनै सहयोग गर्न चाहेन ।

एसपी चिरञ्जीव नाथ सिन्हाको निर्देशनमा अपर पुलिस अधीक्षक अशोक कुमार सिंहले यस मामलामा अनुसन्धान सुरु गरेका थिए । अनुसन्धानका क्रममा केही तथ्य सही प्रमाणित भए र प्रहरीले डा. रजनीशको विरुद्ध दुष्कर्म र अन्य धारामा अभियोग दर्ता गरेको छ । अब प्रहरी आरोपी प्रोफेसरको खोजी गर्दैछ ।

यो यौन शोषणको मुद्दाले ठूलो रूप लिइसकेको छ र पुलिस पीडित छात्राहरूसँग बयान लिनको लागि सम्पर्क गर्न प्रयास गरिरहेको छ, तर  लाजका कारण छात्राहरू बयान दिनबाट बचिरहेका छन् ।

प्रोफेसर डा. रजनीशले परीक्षा परिणाम सुधार्ने र जागिर दिलाउने वाचा गरेर छात्राहरूसँग शोषण गरेका थिए । उनले आफैं आफ्नो मोबाइलबाट छात्राहरूसँगका भिडियोहरू रेकर्ड गरेका थिए र ती ५९ भिडियोहरू अहिले सार्वजनिक भएका छन् ।

कलेज प्रशासनले यस मामिलामा डा. रजनीशलाई निलम्बित गरिसकेकाे छ ।