पूर्वडीआईजी जोशीको बयान आज पनि

काठमाडौं – पोखराको सूर्यदर्शन सहकारी ठगी प्रकरणमा पक्राउ परेका पूर्वडीआईजी छविलाल जोशीको बयान आज पनि जारी रहने भएको छ ।

कास्की प्रहरीले उनीमाथि ठगी र संगठित अपराधमा अनुसन्धान गरिरहेको हो काठमाडौंको शंखमूलबाट पक्राउ परेका जोशीलाई आइतबार नै पोखरा लगिएको हो । उनलाई सोमबार जिल्ला अदालतमा उपस्थित गराइ पाँच दिनको म्याद लिइएको छ ।

कास्की प्रहरीका एक अधिकारीले दिएको जानकारीअनुसार सोमबार जोशीमाथि प्रारम्भिक बयान लिइएको थियो । प्रारम्भिक बयानमा जोशीले सहकारीको रकम अपचलन प्रकरणमा तत्कालीन गृहमन्त्री रवि लामिछाने र गितेन्द्रबाबु राई (जीबी) नै प्रमुख जिम्मेवार रहेको प्रहरी स्रोतले बतायो ।

सूर्य थापा नेतृत्वको सहकारी संस्था बचत रकम दुरुपयोगसम्बन्धी संसदीय छानबिन विशेष समितिले सूर्य दर्शन सहकारीका अध्यक्ष जीबी राई, सदस्य कुमार रम्तेल, तत्कालीन सञ्चालक जोशी र प्रबन्ध निर्देशक रवि लामिछानेलाई कानुनअनुसार कारबाही गर्न सिफारिस गरेको छ ।