कोरोना संक्रमनमा बृद्धि, आज थपिए १८८ जना

काठमाडौं – देशभर पछिल्लो २४ घण्टामा १८८ जनामा कोरोना भाइरस (कोभिड-१९) संक्रमण पुष्टि भएको छ ।

४ हजार ३२ जनाको नमुना परीक्षण गर्दा १८८ जनामा कोरोना भाइरसको संक्रमण देखिएको स्वास्थ्य तथा जनसंख्या मन्त्रालयले जनाएको छ ।

योसँगै नेपालमा कोरोना संक्रमितको कुल संख्या २ लाख ७६ हजार २४४ पुगेको छ । तीमध्ये मंगलबार थप ७७ सहित २ लाख ७२ हजार ९७ जना निको भएका छन् भने ३ हजार १९ जनाको मृत्यु भएको छ । गत २४ घण्टामा कोरोना संक्रमणबाट कसैको पनि मृत्यु भएको छैन ।

हाल देशभर १ हजार १२८ जना सक्रिय संक्रमित रहेको मन्त्रालयले जनाएको छ । केही दिनयता सरकारले कोरोना परीक्षण बढाएसँगै संक्रमितको संख्या पनि बढ्न थालेको छ । भारतमा कोरोना संक्रमणको दर बढेसँगै सीमा नाका सतर्कता अपनाउनसमेत थालिएको छ ।